Shqipëria duhet të anëtarësohet sa më shpejt në BE. Kështu ka deklaruar këtë të enjte (11 maj) Presidenti polak Andrzej Duda gjatë konferencës së përbashkët me Presidentin Bajram Begaj. Teksa mbështeti integrimin europian të Shqipërisë, Duda deklaroi se Shqipëria ka bërë shumë progres me detyrat dhe reformat.
“Deklarova mbështetjen e Polonisë për anëtarësimin e Shqipërisë në BE. Kryesia e Polonisë në kuadrin e BE-së në gjysmën e parë të 2025-ës, kemi thënë qartë se mes prioriteteve përpos forcimit të lidhjeve euroatlantike, të SHBA dhe BE, kemi folur që prioritet i dytë do jetë anëtarësimi në BE për vendet e Ballkanit Perëndimor, Ukrainën, Moldavinë.
I mbështesim ambiciet dhe kuptojmë sakrificat e shoqërisë shqiptare për të realizuar reformat e domosdoshme, këto reforma po realizohen dhe nga ana e infrastrukturës nuk kam dyshim se Shqipëria duhet të jetë sa më shpejt në BE.
E sigurova z.President se këtë anëtarësim do e mbështesim me të gjitha forcat tona”, tha Duda.
Në lidhje me anëtarësimin në BE, Duda u shpreh se Shqipëria do të jetë anëtare e tre deteve. Ai ka shprehur dëshirën që Shqipëria të bashkëpunojë me anëtarët e tri deteve me qëllim zhvillimin e infrastrukturës.
“Në lidhje me anëtarësimin në BE Shqipëria do jetë anëtare e iniciativës së tre deteve. Prandaj që sot kemi shprehur dëshirën që ajo të bashkëpunojë me anëtarët e tre deteve sidomos për zhvillimin e infrastrukturës. Për zhvillimin e kësaj pjese të Evropës, Evropa qendrore ka nevojë për këtë ide. Zhvillimi infrastrukturës ishte arsyeja kryesore e krijimit te tri deteve”, shtoi ai.
Më tej, presidenti polak bëri me dije se ekonomia, shkëmbimi tregtar dhe investimet në infrastrukturë, ishin kryefjalë takimit me homologun Begaj.
Sipas Dudës, sa i përket shkëmbimit tregtar mes dy vendeve, ka pasur një rritje me 60% gjatë vitit 2022. Nëse Shqipëria do të bëhet pjesë e BE-së, tha Duda, do të forcojë edhe më tej lidhjet ekonomike me Poloninë.
“Kontrata të reja dhe forcim i lidhjeve ekonomike, rritje e shkëmbimit tregtar, 60% rritje në 2022.
Kemi potencial të jashtëzakonshëm, 200 milionë euro shkëmbim tregtar mes vendeve tona. Duhet të jetë disa herë më e madhe dhe shpresojmë se kjo do të ndodhë. Nëse bëhet anëtare e BE, Shqipëria do forcojë lidhjet ekonomike me Poloninë”, tha ai.
