“Promovimi fantastik i Shqipërisë” – Reality show holandez xhirohet në natyrën shqiptare

“Një lajm i bukur”.

Kështu e ka përshkruar Kryeministri i Shqipërisë, Edi Rama, zhvillimin e 12 serive të një “reality show” holandez në vendin tonë, duke e theksuar si “promovimi më fantastik i bukurive magjepsëse shqiptare”.

Spektakli i titulluar “I infilturari”, ka xhiruar në natyrën shqiptare gjithë rrjedhën e sezonit të ri të tij.

“Do t’i tregojnë publikut holandez një Shqipëri krejt tjetër nga ajo e stereotipit të krijuar në kaq shumë vite për atdheun e shqiptarëve”, vijon kryeministri.

Sipas tij, fillimisht, kur trupa e xhirimit po hulumtonte në vendin tonë, mundësia që të përzgjidhej natyra shqiptare ishte e ulët. Por, në fund të qëndrimit të tyre pak ditor, ata u bindën 100% se vendi ishte ideal për spektaklin e tyre.

“Shkurt llafi, përgatituni për një dallgë të pazakonshme turistësh holandezë sezonin e ardhshëm”, përfundon postimin e tij Rama.