Kushdo që shkel ligjin mbi ndalimin e mbulimit të fytyrës në vende publike mund të presë një gjobë deri në 1000 CHF, transmeton albinfo.ch. Kjo parashikohet në propozimin legjislativ të paraqitur së fundi nga Këshilli Federal.
Megjithatë, ligji parashikon edhe përjashtime: për shembull, fytyra mund të mbulohet në kisha, objekte tjera fetare dhe vende të të shenjta, shkruan srf.ch.
Mbulimi i fytyrës lejohet gjithashtu për arsye të shëndetit, kushteve klimatike dhe zakoneve lokale, si dhe për të mbrojtur lirinë e shprehjes dhe grumbullimit – për shembull në mitingje.
Në mars të vitit 2021, populli dhe kantonet patën pranuar me shumicë votash iniciativën popullore për ndalimin e mbulimit të fytyrës, përcjell albinfo.ch. Ndërsa disa kantone, si ai i Tiçinos dhe i St. Gallenit patën bërë këtë ndalim me ligj në territoret e tyre edhe para se të mbahej referendumi në nivel vendi.
