Qeveria e Kosovës ka nisur një komunikatë pas bisedës së sotme ndërmjet kryeministrit Avdullah Hoti dhe kancelares gjermane, Angela Merkel ku thuhet se, ajo si sfidë ka listuar edhe “ndryshimet kushtetuese”.
Mirëpo, në komunikatën e Zyrës së kancelares, thuhet se ajo ka kërkuar nga Hoti reforma në fushën e sundimit të ligjit.
Fjala “Rechtsstaatliche”, përkthyer në gjuhën shqipe i bie sundim i ligjit ose shtet ligjor, kurse Qeveria e ka përkthyer këtë si ”reformë kushtetuese”.
Ndryshimet kushtetuese bëhen nga Kuvendi.
E në orët e pasdites të së hënës, Hoti ka pasur bisedë telefonike edhe me këshilltarin e presidentit francez Emmanuel Macron, Emmanuel Bonne.
“Sot mora mbështetje të fuqishme nga Gjermania dhe Franca! Jam shumë i lumtur të ndaj me ju urimin që mora nga Shkëlqesia e saj, Kancelarja gjermane Angela Merkel, e cila po ashtu shprehu gatishmërinë për bashkëpunim dhe mbështetje të mëtutjeshme për Republikën e Kosovës. Sot pata edhe një bisedë të ngrohtë telefonike me z. Emmanuel Bonne, këshilltar diplomatik i Presidentit të Republikës së Francës, Emmanuel Macron, të cilin e falënderova për mbështetjen në të kaluarën dhe gatishmërinë e Francës për ta ndihmuar Kosovën në rrugën e integrimeve eurotlantike”, ka shkruar Hoti në Facebook.
