Dy turiste humbën tragjikisht jetën në zonën e Valbonës, në Tropojë, pasi ranë në greminë. Burime zyrtare të policisë bëjnë të ditur se viktimat janë një turiste belge dhe një franceze. Ato mësohet se po eksploronin zonën kur u rrëzuan për shkak të terrenit të thepisur. Me marrjen e njoftimit, autoritetet nisën menjëherë kërkimet dhe trupat e turisteve u gjetën në vendin e quajtur “Qafë Valbonë”.
“Pas njoftimit se dy turiste të huaja, duke eksploruar zonën e Valbonës, ishin rrëzuar për shkak të terrenit të thepisur dhe kishin rënë në greminë, shërbimet e Komisariatit të Policisë Tropojë, ato të Drejtorisë Vendore dhe të Policisë Kufitare, së bashku me ekipin mjekësor, janë nisur menjëherë në drejtim të vendit ku kishin rënë dy turistet. Pavarësisht territorit shumë të vështirë dhe motit të keq me mjegull dhe me borë, shërbimet e Policisë, pas shumë kërkimesh, kanë bërë të mundur që në vendin e quajtur “Qafë Valbonë”, të gjenin trupat e pajetë të dy turisteve, shtetases belge B. M. dhe shtetases franceze J. B”, thotë policia në një njoftim për mediat.
Pavarësisht angazhimit të policisë, skuadrës alpine të FNSH, terreni i vështirë dhe moti i keq e ka bërë të pamundur deri në këto momente nxjerrjen e trupave nga gremina. Policia thotë se po bashkëpunon me Emergjencat Civile dhe Ministrinë e Mbrojtjes në këtë operacion.
“Në ndihmë të shërbimeve policore është nisur menjëherë skuadra alpine e FNSh Shkodër, pasi për shkak të terrenit shumë të vështirë dhe motit të keq, punonjësit e Policisë që ndodhen në vendngjarje, e kanë të pamundur nxjerrjen e trupave nga humnera. Po për shkak të motit të keq, edhe helikopteri nuk ka mundur të ulet në vendin ku janë gjetur të pajeta turistet. Për të mundësuar nxjerrjen e trupave të pajetë, shërbimet e Policisë vendore dhe të asaj kufitare, si dhe skuadra alpine, po bashkëpunojnë me Emergjencat Civile dhe me Ministrinë e Mbrojtjes. Grupi hetimor i Drejtorisë Vendore të Policisë Kukës ndodhet në vendngjarje dhe në drejtimin e Prokurorisë, po punon për zbardhjen e rrethanave të kësaj ngjarjeje dhe për përcaktimin e shkakut të humbjes së jetës së dy turisteve”, thuhet më tej në njoftim.
