Reagimet e NATO-s, Gjermanisë, Britanisë,… – pas deklaratës së Macron për “mundësinë e vendosjes së trupave në Ukrainë”

Pas një takimi të liderëve evropianë në Paris të hënën, presidenti francez Emmanuel Macron tha se dërgimi i trupave perëndimore në Ukrainë “nuk mund të përjashtohet”.

Dhe komentet e tij kanë marrë një përgjigje të shpejtë nga udhëheqës të ndryshëm, me një mesazh të qartë: kjo nuk do të ndodhë, shkruajnë mediat e huaja.

Një reagim ka ardhur edhe nga Rusia, ku zëdhënësi i Kremlinit, Dmitry Peskov tha të martën se konflikti me Rusinë do të ishte i pashmangshëm nëse vendet perëndimore dërgonin trupa në Ukrainë.

Por çfarë thonë vendet e tjera perëndimore?

NATO: Një zyrtar i NATO-s i ka thënë CNN se “nuk ka plane” për të vendosur trupa luftarake në terren në Ukrainë. Ata thanë se së bashku me aleatët e tyre ata tashmë po ofrojnë “mbështetje të paprecedentë ushtarake” për vendin dhe do të vazhdojnë të mbështesin kombin evropian siç ka bërë deri tani.

Gjermania: Kancelari gjerman Olaf Scholz theksoi se kombet ranë dakord në takim se “nuk do të ketë trupa tokësore, nuk do të ketë ushtarë në tokën ukrainase të dërguar atje nga vendet evropiane ose shtetet e NATO-s”.

Sllovakia: Kryeministri sllovak Robert Fico paralajmëroi të hënën se propozimet e shteteve perëndimore për të dërguar trupa në Ukrainë do të çonin në një “përshkallëzim të ndjeshëm të tensioneve”. Fico tha se qeveria e tij “kurrë nuk do të pranojë të dërgojë trupa sllovake në luftën në Ukrainë”.

Polonia: Kryeministri Donald Tusk bëri të ditur se vendi “nuk po konsideronte dërgimin e ushtarëve tanë në Ukrainë”, por shtoi se duhet të ndihmojë Ukrainën të mbrohet kundër pushtimit rus, sipas Agjencisë Polake të Shtypit (PAP).

Hungaria: Ministri i Jashtëm, Péter Szijjártó, njoftoi se Hungaria nuk ishte e përgatitur të dërgonte as armë dhe as ushtarë në Ukrainë. “Lufta duhet të përfundojë, jo të thellohet dhe zgjerohet”, tha ai në një postim në Facebook.

Mbretëria e Bashkuar: Britania nuk ka plane për një dislokim trupash në Ukrainë, tha të martën një zëdhënës i kryeministrit Rishi Sunak, sipas Reuters.