Një dron që fluturonte mbi qendrën e Kievi pranë zyrës së presidentit Zelensky, u qëllua dhe u rrëzua nga forcat ajrore të Ukrainës.
Por ndërsa fillimisht u aludua për një atentat të mundshëm ndaj Volodymyr Zelensky-t, u konfirmua më vonë se bëhej fjalë për një dron të forcave të Kievit, i cili kishte humbur kontrollin. Shpërthime u raportuan për rreth 15-20 minuta gjatë mbrëmjes së të enjtes, teksa sistemet e mbrojtjes ajrore qëlluan dronin, siç thanë për të shmangur pasoja të padëshiruara.
“Mjeti pa pilot, Bayraktar TB2 humbi kontrollin rreth orës 20 në rajonin e Kievit gjatë një fluturimi të planifikuar. Vendimi për ta rrëzuar u mor pasi fluturimi i pakontrolluar i një droni në qiellin e kryeqytetit mund të ketë pasoja të padëshiruara”, njoftuan Forcat Ajrore të Ukrainës.
Autoritetet thanë se nuk ka viktima apo të lënduar nga rrëzimi i dronit. Video të përpjekjeve për rrëzimin e mjetit fluturues u shpërndanë gjerësisht në rrjetet sociale dhe brohorima u dëgjuan pa finalizimit të misionit. Shefi i administratës lokale, Serhiy Popko, tha se kishin vënë nën kontroll zjarrin që shpërtheu në një godinë ku droni u rrëzua në zonën e Solomyanskyi, në perëndim të qendrës së qytetit.
Incidenti ndodhi pasi Rusia akuzoi Ukrainën për një sulm të pretenduar me dron kundër Kremlinit, i cili kishte qëllimin të vriste presidentin Vladimir Putin. Të enjten, zëdhënësi Dmitri Peskov e drejtoi gishtin nga SHBA-ja, duke thënë se qëndronte pa dyshim pas këtij sulmi. Zëdhënësi i këshillit kombëtar të sigurisë, John Kirby e cilësoi këtë si një gënjeshtër dhe pretendim qesharak.
