Shqipëria dhe Izraeli thellojnë bashkëpunimin në ekonomi, inovacion dhe teknologji

Ministri i Ekonomisë, Kulturës dhe Inovacionit, Blendi Gonxhja, priti të hënën në një takim ministrin e Energjisë dhe Infrastrukturës së Izraelit, Eli Cohen, me të cilin shkëmbyen mendime për të thelluar bashkëpunimin dypalësh në disa sektorë me interes të ndërsjelltë.

Gjatë takimit, Ministri Gonxhja bëri të ditur se u diskutua mbi iniciativa konkrete, me një theks të veçantë në forcimin e bashkëpunimit ekonomik dhe nxitjen e inovacionit mes dy vendeve. Qëllimi kryesor është krijimi i një klime sa më të favorshme për investimet izraelite në Shqipëri.

“U theksua rëndësia e zhvillimit të një ekosistemi të qëndrueshëm ekonomik që mbështet sipërmarrjen, teknologjinë dhe digjitalizimin,” shtoi ministri Gonxhja, duke nënvizuar vizionin për një ekonomi të bazuar në dije dhe teknologji.

Vëmendja u përqendrua sidomos në promovimin e partneriteteve në fushat e kërkimit dhe zhvillimit (R&D). Gonxhja theksoi se përvoja izraelite në këtë fushë përbën një aset të çmuar për avancimin e kapaciteteve vendase dhe gjenerimin e zgjidhjeve të reja inovative me impakt konkret në ekonomi.

“Diskutuam gjithashtu mbi mundësitë për të zhvilluar projekte inovatore në sektorin e agritech dhe menaxhimit të qëndrueshëm të burimeve ujore,” deklaroi Gonxhja.

Këto fusha konsiderohen me potencial të lartë për ndikim afatgjatë, si në aspektin ekonomik ashtu edhe në atë mjedisor, ku teknologjia luan një rol kyç.

Bashkëpunimi në edukim dhe inovacion shkencor

Në takim u nënvizua gjithashtu rëndësia e bashkëpunimit në fushën e edukimit dhe inovacionit shkencor. Kjo do të realizohet përmes shkëmbimeve akademike dhe ndërtimit të urave të bashkëpunimit ndërmjet institucioneve të arsimit të lartë dhe qendrave të ekselencës kërkimore të Shqipërisë dhe Izraelit.

Ky takim shënon një hap të rëndësishëm drejt forcimit të marrëdhënieve dypalëshe dhe shfrytëzimit të ekspertizës izraelite në fusha strategjike për zhvillimin e Shqipërisë.