Skandaloze: Një burrë i maskuar dhe me çekan, vandalizon posterin e Komandant Lleshit dhe e xhiron veten

Kryetari i Komunës së Bujanocit, Arbër Pajaziti, ka reaguar pas vandalizimit të posterit që promovon koncertin në kuadër të manifestimit “Ditët e Komandant Lleshit”.

Ai e ka quajtur këtë veprim një sulm të papranueshëm ndaj kujtesës historike dhe kulturës shqiptare.

“Me shqetësim dhe indinjatë kemi mësuar për aktin vandal ndaj posterit që promovon koncertin në kuadër të manifestimit të ‘Ditëve të Komandant Lleshit’. Thyerja e xhamit dhe dëmtimi i këtij materiali nuk është thjesht një sulm ndaj një posteri promovues – është një goditje e drejtpërdrejtë ndaj kujtesës sonë historike, ndaj kulturës shqiptare dhe përpjekjeve për të nderuar figurat që kanë dhënë gjithçka për lirinë dhe dinjitetin tonë”, shkroi Pajaziti.

Ai shtoi se ky veprim nuk përfaqëson vlerat e qytetarëve të komunës së Bujanocit.

“Ky akt i ulët nuk përfaqëson vlerat e komunitetit tonë të shumëllojshëm, i cili ndërtohet mbi respektin, tolerancën dhe bashkëjetesën. E dënojmë fuqishëm këtë veprim dhe i bëjmë thirrje autoriteteve kompetente ta hetojnë rastin me seriozitet dhe të vënë përgjegjësit përpara drejtësisë.”

Pajaziti përfundoi duke theksuar se manifestimi do të vazhdojë sipas planit.

“Nuk do të lejojmë që akte të tilla të cënojnë frymën e unitetit dhe respektit që përpiqemi të kultivojmë çdo ditë. Manifestimi ‘Ditët e Komandant Lleshit’ do të vazhdojë siç është paraparë – me dinjitet, krenari dhe në nderim të historisë sonë.”

Ridvan Qazimi, i njohur me nofkën “Komandant Lleshi”, ishte një nga komandantët më të shquar të Ushtrisë Çlirimtare për Preshevë, Medvegjë dhe Bujanoc. Ai ra dëshmor më 24 maj 2001 në fshatin Tërnoc i Madh.