Sveçla tregon në detaje kush është Millan Bozhoviqi i arrestuar dje nga Policia

Ministri i Brendshëm i Kosovës, Xhelal Sveçla, ka dalë me një shpjegim të gjatë se kush në fakt është Millan Bozhoviq, personi i arrestuar nga Policia e Kosovës i akuzuar për plagosje të pjesëtarëve policor[ të vendit dhe zjarrvënieve ndaj veturave me targa RKS. Por, jo vetëm kaq, Sveçla doli me një shkrim të detajuar rreth veprimtarisë të tij kriminale.

Shkrimi i plotë i Sveçlës:

Institucionet e Serbisë, krerët e tyre, janë të interesuar sërish të destabilizojnë pjesë të vendit ku jeton komuniteti serb në Kosovë. Kështu ka bërë historikisht. Ata vazhdojnë të mbrojnë dhe glorifikojnë kriminelë të cilët kryejnë akte edhe terroriste në Republikën tonë.

Përveç djegies së veturave në veri, plagosjes së pjesëtarëve të Policisë së Kosovës, dëmtimit të infrastrukturës sonë kritike, kalimit ilegal të kufirit, rrahjeve të qytetarëve serbë, haraçit dhe zjarrvënies së bizneseve lokale, ai ka marrë pjesë edhe në sulmet ndaj shtëpive dhe pronave të pjesëtarëve serbë të Forcës së Sigurisë së Kosovës si dhe dyshohet për vrasjen e një pjesëtari të EULEX.

Çdo qenie njerëzore, jo thjesht zyrtarë publik apo politik, do të ishte distancuar e do të dënonte këto veprimtari për të cilat akuzohet Bozovic. Por jo dhe krerët e institucioneve të Serbisë dhe ata të Listës Serbe. Madje, duket se arrestimi dhe dërgimi i tij para drejtësisë ka lëkundur themelet e Listës Serbe dhe zyrës së ashtuquajtur për Kosovë.

Siç u pa dje, ata po përdorin gjuhë kërcënuese publikisht. Madje, thërrasin për kryengritje dhe mosbindje për shkak të arrestimit të një recidivisti kriminal.

Mbrëmë pas këtyre thirrjeve janë sulmuar pjesëtarët e policisë sonë me shok bomba në Mitrovicë të Veriut.

Para shprehjes me zell të skajshëm në mbrojtje të kriminelëve, Beogradi, Lista Serbe dhe zyra e ashtuquajtur për Kosovë duhet të deklarohen e pozicionohen rreth veprimtarisë së “Mbrojtjes Civile” dhe “Brigadës së Veriut”.

Institucionet  e Republikës së Kosovës nuk do të lejojnë në asnjë formë që siguria e qytetarëve tanë në veri të cënohet, që ata të ndjehen të frikësuar apo të terrorizuar nga kushdo.

Çdo kriminel apo grup i organizuar kriminal, pavarësisht përkatësisë etnike dhe çdo dallimi tjetër do të përballet me forcën e ligjit, pa asnjë kompromis.

Institucionet e sigurisë përkundër rrezikut dhe sulmeve të vazhdueshme po vijojnë angazhimin e tyre në luftim të çdo lloj kriminaliteti, në mbrojtje të qytetarëve e në garantim të rendit dhe ligjit.

Çdo kush dhe ne presim që institucionet e drejtësisë të veprojnë sa më parë, pa dilema e hezitim. Republika jonë do të mbrohet në çdo cep dhe nuk ka organizim kriminal që mund të sfidojnë zyrtarët e vendit tonë.