Trump i vendos tarifa 125 për qind Kinës – i pauzon për vendet që nuk morën masa ndaj SHBA-së

Presidenti amerikan, Donald Trump, ka reaguar sërish në rrjetet sociale, duke vënë në shënjestër Kinën me një vendim të papritur dhe drastik në fushën e tregtisë.

Në një mesazh të fundit në Truth Social, Trump ka njoftuar se tarifat ndaj Kinës do të rriten në 125 për qind, me efekt të menjëhershëm.

Ai e ka justifikuar këtë vendim me mungesën e respektit që, sipas tij, Kina ka treguar ndaj Tregjeve Botërore dhe ndaj vetë Shteteve të Bashkuara të Amerikës.

“Bazuar në mungesën e respektit që Kina ka treguar ndaj Tregjeve Botërore, unë, që nga ky moment, po rris Tarifën që Shtetet e Bashkuara të Amerikës i vendosin Kinës në 125 për qind, me efekt të menjëhershëm. Në një moment të caktuar, shpresojmë që në të ardhmen e afërt, Kina do ta kuptojë se ditët kur ajo përfitonte në kurriz të SHBA-së dhe vendeve të tjera nuk janë më të qëndrueshme apo të pranueshme”, deklaroi 78-vjeçari.

Ndërkohë, lideri amerikan theksoi se mbi 75 vende të tjera kanë kontaktuar autoritetet amerikane – përfshirë Departamentin e Tregtisë, Thesarin dhe Zyrën e Përfaqësuesit të Tregtisë – për të negociuar në mënyrë konstruktive mbi çështje që lidhen me tregtinë, barrierat tregtare, tarifat, manipulimin e monedhës dhe masat jo-monetare.

Duke vlerësuar se këto shtete nuk kanë reaguar me masa hakmarrëse ndaj SHBA-së, Trump ka njoftuar gjithashtu një vendim tjetër: një pauzë 90-ditore dhe një tarifë reciproke të reduktuar ndjeshëm, prej vetëm 10 për qind, për këtë periudhë – gjithashtu me efekt të menjëhershëm.

“Faleminderit për vëmendjen ndaj këtij çështjeje!”, përfundon mesazhin e tij presidenti amerikan.