Trump thotë se është ‘shumë nervoz’ me Putinin për Ukrainën

Donald Trump ka thënë se është “shumë nervoz” me Vladimir Putinin për vënien në dyshim të lidershipit të Ukrainës.

Në një ndryshim të mprehtë toni ndaj Moskës, presidenti amerikan i tha një reporteri të NBC-së se është nervozuar nga dyshimet e homologut të tij rus për besueshmërinë e Volodymyr Zelenskyt, shkruan The Guardian.

“Nëse Rusia dhe unë nuk arrijmë ta bëjmë një marrëveshje për ndalimin e gjakderdhjes në Ukrainë, edhe nëse mendoj se ishte faji i Rusisë, që mund të mos jetë, por nëse mendoj se ishte faji i Rusisë, do të vendos tarifa dytësore mbi naftën, mbi të gjithë naftën që del nga Rusia”, tha ai.

Sanksionet e përshkallëzuara ndaj Rusisë “do të thotë që nëse blini naftë nga Rusia, nuk mund të bëni biznes në Shtetet e Bashkuara,” tha ai. “Do të ketë një tarifë prej 25% mbi të gjithë… mbi të gjithë naftën, një tarifë prej 25 deri në 50 pikë mbi të gjithë naftën”.

Trump tha se planifikon të flasë me Putinin në javën e ardhshme.

Ai la të kuptohet se thirrja e Putinit për një lidership të ri në Ukrainë do të thotë se një marrëveshje paqeje mund të vonohet. “Lidership i ri do të thotë që nuk do të kesh një marrëveshje për një kohë të gjatë, apo jo?” tha ai.

“Nëse ndiej, nëse jemi në mes të një negociate, mund të thuash se isha shumë i zemëruar, i acaruar, kur Putini tha dje se… e di, kur Putini filloi të hynte në besueshmërinë e Zelenskyt, sepse kjo nuk po shkon në drejtimin e duhur, e kupton?”.

Komentet e Trumpit vijnë pas muajsh kritikash se administrata po i nënshtrohet agresionit rus në Ukrainë për ta ndalur luftën trevjeçare. Ai më parë ka kritikuar Zelenskyn, duke thënë se ishte i lodhur nga mënyra se si po e trajtonte luftën dhe duke e quajtur atë diktator për mosmbajtjen e zgjedhjeve të reja.

Trump tha se ka folur me Putinin “jo shumë kohë më parë” dhe ia ka shprehur zemërimin e tij, por se pavarësisht ndjenjave të tij, ka “një marrëdhënie shumë të mirë me të”.

Trump gjithashtu e përdori intervistën e tij për NBC për ta kërcënuar Iranin me ndëshkime nëse nuk arrin një marrëveshje me Washingtonin për programin e tij bërthamor.

“Nëse nuk bëjnë një marrëveshje, do të ketë bombardime”, tha ai, duke shtuar se do t’u vendos edhe atyre “tarifa dytësore”.