U arrestua për arsenal armësh, si u lirua nga burgu Fatjon Murati, miku i rivalit të Vis Martinajt

Fatjon Murati pronari i lokalit ku ndodhi masakra mbrëmjen e djeshme në Tiranë është një emër i njohur për drejtësinë. Ai njihet si miku i Endrit Dokles, rivalit të Ervis Martinajt i cili rezulton i zhdukur prej muajsh.

Murati ishte arrestuar në tetor të 2023 pas zbulimit të një arsenali armësh në një apartament në zonën e Farkës, bashke me shtetasin Kristjan Gjini. 2 muaj pas arrestimit, atij iu ndryshua masa e sigurisë nga “Arrest në burg” në “Arrest shtëpie. Ka qenë prokuroria e Tiranës që ka rikualifikuar veprën penale, nga ajo e “mbajtës pa leje të armëve të kryer në bashkëpunim” në “armë mbajtje pa leje në banesë”. Kjo sepse sipas tyre, në një prej kutive ku mbaheshin armët u gjet vetëm një gjurmë gishti e Muratit dhe kaq ka mjaftuar për t’i lehtësuar pozitat. Pas kësaj, gjykata e shkallës se parë ka zëvendësuar masën e sigurisë nga ajo e “Arrestit në burg në “Arrest shtëpiak”. Me herët Apeli kishte refuzuar ndryshimin e masës “arrest në burg”.

Ndërkohë, Murati është dyshuar dhe për përfshirjen e tij në masakrën e Fushë-Krujës, për vrasjen e Brilant Martinajt dhe dy shokëve të tij, Dikler Vata dhe Besmir Hoxha. Deri në këto momente ai rezulton i shpallur në kërkim, pasi gjatë kontrolleve të policisë, Murati nuk u gjet në banesën e tij.