Pas kundërofensivës zhgënjyese në terren, forcat e Kievit kanë mundur të sigurojnë një fitore të rëndësishme ndaj Rusisë këtë fundvit. Ukraina sulmoi një anije të madhe ruse në portin e Fedosias, në gadishullin e aneksuar të Krimesë, duke vrarë një person.
Lajmi u konfirmua nga Moska të martën, pasi Kievi raportoi më herët se kishte shkatërruar një luftanije të rëndësishme ruse me raketa Cruz. Ministria e Mbrojtjes në Rusi u citua nga agjencia e lajmeve Interfax të thotë se Ukraina kishte ndërmarrë një sulm raketor kundër Fedosias dhe se anija gjigante e zbarkimit “Novocherkassk” ishte dëmtuar.
BREAKING: New footage reported to be showing moment of Ukrainian strike on Russian Ropucha-class landing ship Novocherkassk at Feodosia port of Crimea.
— Breaking Alerter (@BreakingAlerter) December 26, 2023
“Novocherkassk”, e cila u ndërtua në Holandë dhe nisi shërbimin në fund të viteve ‘80, është e projektuar për zbarkime amfibe dhe mund të mbajë lloje të ndryshme të mjeteve të blinduara, përfshirë tanke. Pamje të publikuara në disa media ruse në Telegram tregojnë shpërthime të fuqishme dhe zjarr në port.
Guvernatori i instaluar nga Moska në Krime, Sergei Aksyonov, bëri të ditur se përveç një personi të vrarë, dy të tjerë ishin plagosur dhe 6 vetë ishin evakuar nga shtëpitë e tyre. Edhe pse kundërofensiva ukrainase ka shënuar pak përparim në terren dhe trupat e Moskës kanë rimarrë hov në disa zona, Kievi ka qenë në gjendje të kryejë një sërë sulmesh ndaj Krimesë, ku gjendet flota ruse në Detin e Zi, duke i shkaktuar dëme serioze.
