Motra e Ukshin Hotit, Myrvete Hoti-Kosumi, ka rrëfyer për maltretimet që i ishin bërë vëllait të saj në burg nga forcat serbe.
E ftuar në emisionin Frontal në T7 me Arsim Lanin, ajo ka treguar se gjatë kohës sa Ukshin Hoti qëndronte në burg, atyre nuk i ishte lejuar as të flisnin në gjuhën shqipe.
Ndërsa, Hoti-Kosumi ka rrëfyer se Ukshin Hoti u kishte thënë forcave serbe se ai nuk do të flet asnjë gjuhë tjetër pos asaj shqipe.
“Atje na ndaluan me fol gjuhën shqipe. Unë shkova me djalin e tij e bashkëshortin tim. Kur doli ai e ka ngrit dorën dhe tha se asnjëherë në jetën time nuk e nënçmoj gjuhën e nënës time, nuk flas gjuhë tjetër”, ka treguar ajo.
Pas kësaj, ajo thotë se ishin kthyer në shtëpi.
Ndërsa, Ukshin Hoti i kishte kërkuar që të mos shkoj më në burg.
“Ne e ndërprejtëm vizitën. Ukshini më tha motër mos hajde më. Unë e shihja vet në çfarë gjendje ishte, shumë i dobët shumë i shqetësuar”, ka deklaruar ajo.
Hoti-Kosumi ka treguar se pas kësaj kishte dëgjuar se Hoti nuk ishte më në mesin e të gjallëve.
Por që pas vizitës që i kishte bërë, e kishte parë që ai ishte gjallë, por në gjendje shumë të rëndë.
“Jodrejtëpërdrejtë më patën thënë se Ukshin Hoti nuk është në mesin e të gjallëve. Një gazetare më pat pyet se a kam qen në burg. Unë kam dëgju se kishin dashtë gazetat me shtyp lajmin se Ukshin Hoti nuk është në mesin e të gjallëve, por kur e kanë kuptu që po shkoj në vizitë kanë prit se çfarë lajmi po jap. Unë kur kam shkuar e jam gjetur gjallë por në gjendje të rëndë për shkak të maltretimeve”, ka rrëfyer ajo.
Përndryshe, ajo ka deklaruar se nuk ka pasur përkrahje për zbardhjen e fatit të Ukshin Hotit.
