VIDEO: Vetëm me një çantë shpine, si u nis biznesmeni turk nga Stambolli për t’u fshehur në Shqipëri

Mediat turke kanë publikuar pamjet e plota të shkëputura nga kamerat e aeroportit, në momentin kur pronari i “Thodex”, Faruk Fatih Özer arratiset nga vendi.

Vetëm me një çantë shpine, Faruk Fatih Özer mbërrin në aeroportin e Stambollit me një makinë të zezë, të martën, më 20 prill. Sapo ora shënoi 17:15, ai u fut brenda dhe dorëzoi pasaportën në spotelin e biletave.

Nga aty futet në terminalin numër 3 dhe merr avionin për në Tiranë, kryeqytetin e Shqipërisë.

Vlen për t’u përmendur se 27-vjeçari nuk pati kontakt me asnjë person gjatë qëndrimit të tij në aeroport dhe se gjithë kohën u paraqit i qetë për të mos tërhequr vëmendje.

27-vjeçari Ozer është person i shpallur në kërkim ndërkombëtar nga autoritetet policore turke dhe nga Sekretariati i Përgjithshëm i Interpolit në Lyon pasi rezulton i dyshuar për mashtrim në shtetin turk nëpërmjet valutës elektronike bitcoin që kap vlerën rreth 2 miliardë dollar.

Por Ozer, nga ana e tij, mohoi akuzat në një deklaratë në Twitter. Ai tha se kompania ishte në shënjestër të një fushate shpifjesh. Sipas tij, kompania pezulloi përkohësisht aktivitetin, pasi llogaritë treguan një aktivitet të pazakontë për shkak të një sulmi kibernetik. Ozer gjithashtu tha që pretendimet se paratë ishin zhdukur ishin të pavërteta, ndërkohë që mbetet e paqartë se pse ai nuk është dorëzuar ende, sa kohë që beson në pafajësinë e tij.

Policia shqiptare ka dhënë një shpërblim prej 50 mijë dollarësh, për të gjithë personat që japin informacion mbi vendodhjen e tij.