Të gjitha familjet nga mesi i qershorit do të marrin nga një kupon deri në 50 euro nga Bashkia e Vjenës. Kjo ka për qëllim të forcojë bizneset e hotelerisë që do të hapen tërësisht të premten. Siç dihet, hoteleria është goditur rëndë nga kriza me Covid-19, ka thënë të mërkurën kryetari i Bashkisë së Vjenës, Michael Ludwig (SPÖ), shkruan oe24.at.
Të gjitha, 950.000 familjet që banojnë në Vjenë do të përfitojnë nga ky subvencion, tha kryebashkiaku në një konferencë për shtyp.
Familjet me një anëtar do të marrin kupon prej 25 euro, ndërsa familjet me më shumë anëtarë, kuponin prej 50 eurosh. Këto kupone mund të shfrytëzohen në të gjitha restorantet dhe kafenetë e Vjenës deri në fund të shtatorit. Ju mund të ushqeheni dhe të pini çfarë të doni në vlerë të kësaj shume, por duhet të keni kujdes se këto nuk vlejnë për pije alkoolike.
Ky subvencion do t’i kushtojë Bashkisë së Vjenës 40 milionë euro, por kryetari Michael Ludvig deklaroi se “qyteti mund ta lejojë këtë”.
Kryebashkiaku Ludwig ka thënë se të gjitha bizneset e hotelerisë në Vjenë sjellin rreth 1.4 miliard euro në vit dhe ky subvencion do të jetë një nxitje dhe stimulim për qytetarët e Vjenës që me ato kuponë të vizitojnë kafenetë dhe restorantet e tyre të preferuara dhe më këtë të ndihmojnë sadopak rimëkëmbjen e bizneseve të hotelerisë së kryeqytetit austriak.
