Vuçiqi: SHBA nuk mund të përzihet në punët e brendshme të Serbisë

Presidenti i Serbisë, Aleksandër Vuçiç, gjatë një interviste Euro News Serbia, ka folur lidhur me propozimin që ja ka bërë kryeministri i Kosovës Albin Kurti, në kuadër të dialogut Kosovë – Serbi, për ta shkarkuar Veljko Odaloviçin nga komisioni qeveritar serb për të pagjeturit.

Sipas Vuçiç, asnjë shtet nuk mund të përzihet një shteti sovran si Serbia, madje as Shtetet e Bashkuara të Amerikës (SHBA).

“Nëse Shtetet e Bashkuara të Amerikës na kërkojnë ta bëjmë atë, ne, si një shtet sovran, i pavarur dhe i përgjegjshëm, nuk duhet ta pranojmë”, tha Vuçiç.

Ai ka folur edhe për dialogun Kosovë – Serbi, duke thënë se Serbisë nuk i konvenon që çështja e Kosovës të mbetet e ngrirë.

“Kjo na çon drejt trazirave, konflikteve, diçka për të cilën askush prej nesh nuk ka nevojë, më së shumti për Serbinë, e cila po ecën përpara me shpejtësi ekonomikisht në këtë moment”.

Vuçiç, gjithashtu ka treguar se Serbia është e gatshme për një kompromis me Kosovën.

Kryeministri Kurti me 15 qershor të këtij viti gjatë takimit të parë me presidentin Vuçiç në kuadër të dialogut Kosovë – Serbi kishte prezantuar Vuçiç-it katër propozime në takimin e Brukselit, ku një ndër to ishte edhe zëvendësimi i Veljko Odaloviçit.