Banorët e Karaçevës kanë dalë për të protestuar pas zhvillimeve të fundit në këtë fshat të Kamenicës.
Me flamuj të Kosovës e Amerikës në duar ata po kërkojnë mbrojtje, pasi disa ditë më parë xhandarmëria serbe u fut brenda territorit të Kosovës, përkatësisht në fshatin Karaçevë të Kamenicës, shkruan Reporteri.
Banorët e këtij fshati kishin pasur ankesa të vazhdueshme për raste të tilla të futjes së xhandarmërisë serbe brenda territorit tonë.
Lëvizjet e xhandarmërisë serbe janë parë edhe ndërkohë që banorët shqiptarë po protestonin.
Në disa pamje të publikuara në media, ata shihen duke patrulluar matanë rrugës.
Protesta në Karaçevë gjatë tërë kohës është monitoruar nga pjesëtarë të KFOR-it.
Kryeministri i Kosovës, Avdullah Hoti ka thënë se banorët e kësaj ane nuk do të mbeten të rrezikuar dhe se veprimet e Qeverisë do të jenë në përputhje me Kushtetutën.
Në anën tjetër, KFOR ka thënë se hyrja e xhandarmërisë serbe brenda territorit të Kosovës ishte në kuadër të një patrullimi të përbashkët.
