Sonja Biserko, Presidentja e Komitetit të Helsinkit për të Drejtat e Njeriut në Serbi, gjatë një takimi që ka zhvilluar në Prishtinë me kryeministrin Albin Kurti, ka ngritur alarmin se Beogradi zyrtar po planifikon zhvendosjen e serbëve të Kosovës, sidomos atyre nga veriu, për në Sanxhak. Biserko, ka informuar Kurtin lidhur me një plan që ka Vuçiç, i cili po planifikon zhvendosjen e serbëve të Kosovës, për në Sanxhak, ku siç po thuhet po ndërtohen shtëpi dhe banesa për ta.
Analisti politik, Artan Muhaxhiri tregon për A2 CNN se skenari i Vuçiç për zhvendosjen e pakicës serbe nga Kosova në Sanxhak, ka për qëllim që të destabilizojnë rajonin. “Shteti i Kosovës nuk ka fuqi, nuk ka mjete që të mund ta vërtetonte në mënyrë autonome këtë deklaratë të zonjës Biserko, mirëpo këtë mund ta bëjë me ndihmën e aleatëve, duke bërë presion në Uashington, Bruksel, Paris e Londër, që aleatët t’i bëjnë presion Beogradit mbi këtë temë që është jashtëzakonisht e rëndësishme”, tha ai.
Nga ana e tij, Eksperti i Sigurisë në Kosovë, Nuredin Ibishi thekson për A2 CNN se, reagimet nga faktori ndërkombëtarë që kanë kritikuar qeverinë e Kosovës për aksionin në Veri mund ti shërbejë Vuçiçit, për të realizuar skenarë destabilizues.
“Është operacion i planifikuar më herët, ka të bëjë me sigurinë, instalimin e institucioneve paralele ilegale. Për këtë arsye është veprim i pastër policor në bashkëpunim me institucioneve të tjera të sigurisë e gjyqësisë”, thotë Muhaxheri.
Sanxhaku i cili është territor i banuar kryesisht nga shqiptarët dhe boshnjakët, ku serbët janë pakicë, ekspertët vlerësojnë se ky është një skenarë i dalë nga rekomandimet e kuvendit të “botës serbe”, për të ndryshuar demografin etnike në atë zonë. A do të lejohet që një skenar i tillë të realizohet nga Vuçiç, kjo do të varet shumë nga reagimi i fortë i Perëndimit.
