700 viktima në Izrael dhe 413 në Gaza – IDF-ja nis një valë të re sulmesh ajrore në Rripin e Gazës

Bilanc tragjik vijon të rëndohet pas dyluftimeve mes militantëve të Hamasit dhe IDF-së (Forcat e Mbrojtjes së Izraelit), ku 700 persona të paktën kanë mbetur të vrarë në Izrael, sipas raportimit nga transmetuesi Channel 13, me mbi 2 mijë të plagosur.

Forcat e Mbrojtjes të Izraelit thanë më herët se po kryejnë një valë të re sulmesh ajrore në Rripin e Gazës.

IDF-ja thotë se po godet objektivat që i përkasin grupit terrorist Hamas.

Nga ana tjetër, Ministria e Shëndetësisë e drejtuar nga Hamasi në Rripin e Gazës thotë se 413 palestinezë janë vrarë dhe 2 mijë e 300 të tjerë janë plagosur në Rripin e Gazës.

Shumica e tyre me sa duket u vranë në Rripin e Gazës si rezultat i sulmeve hakmarrëse të Izraelit.

IDF tha se ka vrarë të paktën 400 terroristë palestinezë si në Izrael ashtu edhe në sulmet në Gaza.

Programi Botëror i Ushqimit i Kombeve të Bashkuara (WFP) ka bërë thirrje për krijimin e korridoreve humanitare për të sjellë ushqim në Gaza ndërsa sulmet ajrore izraelite goditën enklavën palestineze.

“Ndërsa konflikti intensifikohet, civilët, duke përfshirë fëmijët dhe familjet e cenueshme, përballen me sfida në rritje në aksesin në furnizimet thelbësore ushqimore”, tha WFP-ja.

WFP-ja ofron ndihmë të drejtpërdrejtë ushqimore për rreth 350 mijë palestinezë çdo muaj, ndërsa ofron gjithashtu ndihmë për gati një milion palestinezë në bashkëpunim me partnerë të tjerë humanitarë nëpërmjet transfertave të parave.

“Ndërsa shumica e dyqaneve në zonat e prekura në Palestinë aktualisht mbajnë rezerva ushqimore për një muaj, këto rrezikojnë të shterohen me shpejtësi pasi njerëzit blejnë ushqime nga frika e një konflikti të zgjatur”, tha ai.