Ish-i fejuari i Imanit i foli asaj për influencuesin e mediave sociale, Andrew Tate, në tetor. Tre muaj më vonë, thotë ajo, gjithçka kishte marrë fund në marrëdhënien e tyre.
Ish-partneri i saj u bë shumë kontrollues, shtoi ajo, pasi ai filloi të dëgjonte podcastin e Tate, duke promovuar role gjinore patriarkale. Ai i tha asaj se donte marrëdhënie poligamie – diçka që ajo thotë se kurrë nuk e kishin diskutuar më parë.
“Ishte ferr”, i tha ajo CNN-it.
Çifti mysliman ishte takuar në fund të vitit 2020 dhe u dashuruan për shkak të interesit të përbashkët për udhëtime, shtoi ajo. Ata u fejuan vitin e kaluar dhe Imani e la jetën e saj në Britani për t’iu bashkuar të fejuarit në Dubai. Ata caktuan datën e martesës për në shkurt.
Por, ajo thotë se sjellja e tij kontrolluese përshkallëzoi derisa ai u bë “person komplet ndryshe”.
“Ai filloi të bëhej abuziv, duke më fyer ose nënçmuar”.
Serena, gazetare nga një familje myslimane në Britani, ka thënë dy vëllezërit e saj filluan t’i ndiqnin pikëpamjet “ektremisht mizogjene” të Tate në shtator pasi e shikuan në YouTube.
“Ai u bë ekstremisht mizofjen, duke më thënë mua dhe nënës se detyra jonë ishte të gatuanim dhe nëse nëna ime nuk gatuan një ditë ai e quan atë dembele”.
Eksperienca e Imanit dhe Serenës reflekton një rritje të grave myslimane që thonë se Tate po indoktrinon burra dhe djem myslimanë me retorikë seksiste, teksa promovon një version çorientues të islamit për të justifikuar mizogjininë dhe obsesionin për dominimin mashkullor.
Tani, ndërsa autoritetet rumune po hetojnë Tate dhe vëllanë e tij, Tristian, për dyshime lidhur me përdhunim dhe trafikim njerëzor, më shumë myslimanë po shqyrtojnë efektet e ndikimit të shfrenuar të Tate tek të rinjtë.
