Berlin prezanton strategjinë.Gjermania synon të ndërtojë ushtrinë më të fortë të Evropës deri në vitin 2039 për të penguar Rusinë

Gjermania ka prezantuar për herë të parë në historinë e saj të pasluftës një strategji të plotë ushtarake, me synimin e qartë për ta shndërruar Bundeswehr-in në forcën konvencionale më të fuqishme të Evropës deri në vitin 2039.

Ministri i Mbrojtjes, Boris Pistorius, e shpalli këtë vizion në një konferencë për shtyp në Berlin, duke e cilësuar si një pikë kthese historike për mbrojtjen gjermane dhe për rolin e vendit brenda NATO-s.

Dokumenti prej 35 faqesh, i titulluar “Përgjegjësia për Evropën”, identifikon Rusinë si kërcënimin kryesor për sigurinë e kontinentit dhe përcakton skenarë për mbrojtjen e territorit të NATO-s.

Strategjia përfaqëson një ndryshim doktrinar, duke e parë hapësirën e sigurisë si të ndërlidhur mes Evropës, Lindjes së Mesme dhe Indo-Paqësorit, në vend që të trajtohen si teatro të veçanta.

“Qëllimi ynë është i qartë: Ne do të vazhdojmë të forcojmë gatishmërinë operacionale të Bundeswehr-it tonë — dhe me një ritëm të shpejtë,” tha Pistorius, duke theksuar se Gjermania po merr më shumë përgjegjësi brenda NATO-s.

Plani parashikon rritjen e trupave aktive nga 185,420 në 260,000 deri në mesin e viteve 2030, si dhe zgjerimin e rezervës nga 60,000 në të paktën 200,000.

Kjo do të krijojë një total prej 460,000 trupash të gatshme për luftim.

Rezerva, e konsideruar më parë si forcë dytësore, do të ketë rol të barabartë me trupat aktive, duke marrë përsipër mbrojtjen e atdheut dhe duke e pozicionuar Gjermaninë si qendër logjistike për aleatët.

Gjermania synon të ndërtojë nga e para kapacitetet e sulmit me rreze të gjatë veprimi.

Pistorius përmendi mbrojtjen ajrore kundër raketave hipersonike, aftësitë e dronëve dhe sulmet me precizion të thellë si fusha prioritare.

“Mbrojtja ajrore për Gjermaninë dhe për NATO-n do të jetë një fushë kyçe për ne,” tha ai, duke nënvizuar rëndësinë e sistemeve moderne të interceptimit.

Paketa përfshin edhe ‘Entbürokratisierungs- und Modernisierungsagenda 2026 (EMA26)’, me 153 masa konkrete dhe 580 hapa zbatimi për të ulur burokracinë, dixhitalizuar proceset dhe integruar inteligjencën artificiale në detyrat administrative.

Një risi është vendosja e datave të skadimit për të gjitha rregulloret e brendshme, duke e bërë sistemin më fleksibël dhe të përshtatshëm për sfidat e ardhshme.

Gjermania ka rritur ndjeshëm shpenzimet ushtarake që nga viti 2022 dhe është bërë furnizuesi më i madh i armëve për Ukrainën. Pistorius pranoi se afatet ambicioze përballen me rreziqe, sidomos për shkak të kërkesës së lartë globale për sisteme mbrojtjeje ajrore.

“Ne kemi paratë dhe kemi aktivizuar prokurimin, por nuk i kontrollojmë të gjitha variablat,” tha ai.