Biznesmeni kinez humb jetën në aksident në aksin Librazhd–Elbasan

Një aksident i rëndë rrugor ka ndodhur në aksin nacional Librazhd–Elbasan, ku ka humbur jetën biznesmeni kinez Li Jianhong, ndërsa disa persona të tjerë kanë mbetur të lënduar.

Ngjarja ka ndodhur në afërsi të Xibrakës, ku sipas të dhënave zyrtare, janë përfshirë dy automjete dhe përplasja ka rezultuar fatale për 60-vjeçarin kinez, i cili ka ndërruar jetë në vendin e ngjarjes.

Li Jianhong ishte kryetar dhe president i kompanisë Xinjiang Grand Scape Group, një nga sipërmarrjet e njohura në rajonin e Xinjiangut, e cila operonte në fusha të ndryshme si turizmi, telekomunikacioni dhe investimet.

Sipas mediave të huaja, kompania e tij kishte asete të konsiderueshme dhe mijëra të punësuar, ndërsa vetë ai njihej edhe për aktivitetin e tij si alpinist dhe aventurier, duke përfunduar disa nga sfidat më të njohura në botë si ngjitja e Mount Everest dhe K2.

Policia ka bërë të ditur se në lidhje me aksidentin është arrestuar drejtuesi i automjetit tjetër, një 26-vjeçar, i dyshuar për shkelje të rregullave të qarkullimit rrugor.

Në vendngjarje kanë ndërhyrë njësitë policore dhe ekipet mjekësore, ndërsa të plagosurit janë transportuar për trajtim në spital.

Grupi hetimor po vijon punën për zbardhjen e plotë të rrethanave të aksidentit.