Dallim të madh për çështjen e integritetit territorial të Kosovës dhe të shteteve tjera në Ballkan në mes të administratës aktuale të presidentit amerikan Joe Biden dhe asaj të ish-presidentit Donald Trump, ka vënë re njohësi amerikan i çështjeve të Ballkanit, Daniel Serwer.
Sipas tij, Bideni e ka bërë të qartë përkrahjen e sovranitetit dhe integritetit territorial të të gjitha vendeve të Ballkanit Perëndimor. Ai ka thënë se kjo mungonte në kohën e Trumpit.
Megjithatë, ai ka thënë se s’ka parë ende një strategji konkrete të Bidenit për këtë çështje.
“Mendoj se administrata aktuale e ka bërë më se të qartë se e përkrah sovranitetin dhe integritetin territorial jo vetëm të Kosovës, por të të gjitha vendeve në Ballkanin Perëndimor, ashtu siç e përkrah edhe perspektivën evropiane të tyre. Dhe këto gjëra nuk ishin shumë të qarta gjatë kohës së administratës Trump. Ata luajtën me idetë e ndarjes së Kosovës, ishte një situatë shumë konfuze me administratën e kaluar. Thënë kjo, është një gjë të kesh objektiva të mira si përkrahja për sovranitetin dhe integritetin territorial e po ashtu, edhe për perspektivën evropiane dhe një gjë krejt tjetër të kesh një plan për t’i bërë të arritshme këto gjëra. Dhe ajo që nuk e kemi parë ende nga kjo qeveri dhe që unë dua t’i jap më shumë kohë, është një plan i vërtetë. Çfarë kanë bërë është caktimi i disa objektivave për të ngushtuar apo minimizuar boshllëkun në mes të BE-së dhe SHBA-së. E kjo është një gjë shumë e mirë, pasi që ky boshllëk u bë edhe më i madh nga administrata Trump. Mirëpo, nuk e kanë shtruar ende një rrugë të qartë drejt këtyre objektivave që ata duan t’i arrijnë”, ka thënë ai në Interaktiv të KTV-së.
