Flasin nga Vetëvendosje, këto janë pritjet e tyre nga Kushtetuesja – kanë disa fjalë edhe për protestat e paralajmëruara

Partia e Isa Mustafës po i vazhdon përpjekjet e saja për krijimin e koalicionit qeverisës, mbi bazën e mandatit që kësaj partie ia ka ofruar presidenti Hashim Thaçi, edhe pse letra e tij nuk është bërë ende publike.

Ndërkohë, nga ana tjetër, kryeministri në detyrë, Albin Kurti, ka përsëritur se do ta kontestojë formimin e kësaj qeverie përmes Gjykatës Kushtetuese, sapo të bëhet publike letra apo shkresa zyrtare e presidentit.

Lidhur më këtë, për “Bota sot”, kanë folur nga Lëvizja Vetëvendosje.

Zyrtari i Lëvizjes Vetëvendosje, Petrit Bicaj, në një prononcim dhënë gazetës “Bota sot”, ka thënë se qeveria në detyrë, e cila udhëhiqet nga kryeministrit në detyrë, Albin Kurti, është duke menaxhuar mirë me vendin, e sidomos në luftën e saj kundër Covid-19.

Sipas tij, Gjykata Kushtetuese medoemos duhet ta zgjidhë ngërçin në të cilin është duke kaluar vendi.

“Mendoj se qeveria në detyrë është duke funksionuar shumë mirë, sidomos në luftën e saj kundër Covid-19, luftë e cila do duhej të ishte alfa dhe omega e çdo partie politike në këtë kohë. Mendoj se Gjykata Kushtetuese medoemos duhet ta zgjidhë këtë ngërç, duke e respektuar kushtetutshmërinë dhe do duhej të vendosë masën e përkohshme, ku qeveria në detyrë vazhdon punën e saj, deri në nxjerrjen e aktgjykimit meritor”, ka thënë Bicaj, të shtunën për gazetën “Bota sot”.

Tutje, ai shprehet se janë të bindur se aktgjykimi meritor duhet bazuar edhe në precedentët e deritanishëm, ku vendi shkon në zgjedhje të jashtëzakonshme.

“E ne jemi të bindur që aktgjykimi meritor duhet bazuar edhe në precedentët e deritanishëm, ku në raste të njëjta, vendi shkon në zgjedhje të jashtëzakonshme”, tha me tej zyrtari i Vetëvendosjes.

Kurse, i pyetur lidhur me protestat e paralajmëruara, Bicaj ka thënë se ato janë instrument demokratik, sidomos në kohë kur tentohet dhunimi dhe ndryshimi i tërë sistemit kushtetues në vend.

“Sa i përket protestave, ato janë e drejtë kushtetuese dhe mendoj që janë instrument demokratik, sidomos në kohë kur tentohet dhunimi dhe ndryshimi i tërë sistemit kushtetues në vend. Andaj, shpresoj në profesionalizmin e gjykatësve të gjykatës kushtetuese dhe jam i bindur që pas pandemisë vendi do shkoj në zgjedhje ku sovrani do vendos se kush duhet të jetë në krye të qeverisë”, ka përfunduar zyrtari i Lëvizjes Vetëvendosje, Petrit Bicaj, për gazetën “Bota sot”.

Kujtojmë se Qeveria në detyrë është rrëzuar me mocion mosbesimi në Kuvend më 25 mars. Që atëherë, presidenti i Kosovës ka nisur konsultimet me partitë politike për formimin e qeverisë së re.