Inspektorati i Policisë së Kosovës nis hetimet ndaj truprojave të Thaçit

Pas votimit të Qeverisë Hoti, presidenti i vendit Hashim Thaçi mbajti sot një konferencë për media.

Por teksa Thaçi po fliste para gazetarëve, një qytetar në sheshin ‘Nëna Terezë’ iu drejtua si ‘O hajn, o hajn’. Me të dëgjuar këtë, truprojat e Thaçit u aktivizuan dhe dhunshëm arrestuan të riun i cili po i referohej Thaçit në këtë mënyrë.

Tashmë është bërë e ditur se Inspektorati i Policisë së Kosovës ka filluar hetimet ndaj pjesëtarëve të Mbrojtjes së Afërt të presidentit Thaçi. Avokati Tomë Gashi ka njoftuar për mediat vendore  se në Inspektorat ka filluar veçse hetimi për këtë rast.

Lidhur me situatën e krijuar sot u deklarua edhe presidenti Thaçi i cili madje e cilësoi ndërhyrjen e truprojave si shumë profesionale. Thaçi shkoi edhe më larg duke thënë se Kurti do të duhej të ishte vetë në këtë moment, e të mos e dërgonte aktivistin.

Thaçi poashtu tha se s’do të lejojnë provokime dhe se për këtë do t’ua tregojnë vendin.