Irani refuzon planin e Trump për paqe

Irani refuzoi marrëveshjen me Donald Trump, përmes një deklarate të zëdhënësit të ushtrisë iraniane.

“Kaq shumë ka arritur niveli i mosmarrëveshjes suaj të brendshme sa po negocioni me veten tuaj? Ata si ne nuk bëjnë kurrë marrëveshje, ata si ju, sot e asnjëherë”, tha Ebrahim Zolfaqari, zëdhënës i ushtrisë së Iranit.

Zëdhënësi i ushtrisë tha se presidenti amerikan po përpiqet që dështimin ta shesë si marrëveshje. Deklarata erdhi si përgjigje ndaj planit me 15 pika që Shtetet e Bashkuara i paraqitën Iranit përmes Pakistanit, ku në këmbim të heqjes së të gjitha sanksioneve ekonomike ndaj Republikës Islamike, kërkohej ndër të tjera që Teherani të mbyllte centralet e pasurimit të uraniumit, të mos mbështeste më grupet e militantëve në Lindjen e Mesme dhe ta shndërronte Ngushticën e Hormuzit në një zonë të lirë të tregtisë detare.

Të martën, presidenti amerikan Donald Trump tha se Irani po kërkonte me ngulm një marrëveshje. Shefi i Shtëpisë së Bardhë ndali të hënën për 5 ditë sulmet amerikane ndaj Iranit, për t’i nxitur fundin e luftës dhe zgjidhjen me dialog.

Megjithatë, Uashingtoni ka gati edhe një plan B, atë të dërgimit të trupave tokësore në Iran. (CBS) Sipas mediave amerikane, po përgatitet zbarkimi nga ajri i 1500 trupave të divizionit ajror të 82-të. Objektivat nuk bëhen të ditura, por ata do të mbështeten edhe nga bombardimet e fuqishme ajrore.

Ambasadori iranian në Kombet e Bashkuara tha se Ngushtica e Hormuzit është e lirë vetëm për anijet me naftë të vendeve jo armiqësore si Kina, India dhe Pakistani, ndërsa të tjerat nuk lejohen.

Ndërkaq, në ditën e 26, sulmet e ndërsjella midis Iranit dhe Izraelit vazhdojnë, ku ndryshe nga aleati i madh, Izraeli nuk e ka ndalur fushatën e bombardimeve në Iran. Ndërsa raketat iraniane, përveç Izraelit, goditën edhe vende të rajonit si Kuvajti dhe Bahreini.