Jashari: Studentët serbë nuk do të duhej të ndaleshin për ta vizituar kompleksin në Prekaz

Ish-kryetari i Skenderajt, Bekim Jashari, është shprehur i shqetësuar me ndalimin që iu bë disa studentëve të huaj, përfshirë edhe nga nacionaliteti serb, për ta vizituar kompleksin Memorial “Adem Jashari” në Prekaz.

Ai ka thënë se aksioni i sotëm pos që është në kundërshtim me traditën shqiptare në raport me mysafirin, bie ndesh edhe me qëndrimet e tyre si familje.

Jashari ka thënë se memoriali i përket sakrificës dhe rezistencës për liri dhe si i tillë është vend i duhur për çdokënd që dëshiron të dijë vlerën e lirisë, duke përfshirë edhe ata që tani distancohen dhe njohin gjenocidin serb në Kosovë.

“Në anën tjetër i kuptoj edhe reagimet e ‘Shqiponjave të Zeza; që të ndikuar nga lajme me tituj nxitës dhe nga emocionet realizuan një aksion jo të menduar aq mirë por gjithsesi pa ndonjë qëllim të keq, andaj edhe duhet mirëkuptuar. Uroj që raste të tilla që prishin imazhin e shtetit dhe shoqërisë sonë të mos përsëriten”, ka thënë ai.