Kali i klonuar në Kinë, vendi aziatik shpreson të nxisë industrinë dhe sportet

I hollë por me gjymtyrë të shëndetshme. Gëzof i zi që shkëlqen dhe një pullë e bardhë në ballë. Sytë i tregojnë ndrojtje, por edhe kuriozitet në të njëjtën kohë. Bëhet fjalë për kalin e parë të klonuar në Kinë, i cili u ekspozua të enjten në Pekin.

Ekspertët thonë se lindja dhe rritja e shëndetshme e kalit mund të ndihmojë vendin aziatik në zhvillimin e industrisë së kuajve dhe sporteve kalorsiake, si dhe të ruajë racat në rrezik zhdukjeje të kuajve kinezë.

Duke vrapuar me gjallëri dhe shkathtësi në arenën e një klubi kalorësiak në periferinë lindore të Pekinit, me dëborën e parë që bie mbi gëzofin e tij, kali i klonuar, i quajtur Zhuang Zhuang, është vetëm 7 muajsh.

Ai lindi më 6 qershor të vitit të kaluar në provincën Gansu, në veri-perëndim të Kinës, nga një kal femër surrogato.

Procesi u realizua në kuadër të një programi klonimi të hartuar në vitin 2021 nga kompania gjenetike “Sinogene Biotechnology” dhe një klubi kuajsh të quajtur “Sheerwood”, me bazë në Pekin.