“Katastrofa e shekullit”/ Tërmeti i 9 ditëve më parë, më vdekjeprurësi në historinë moderne të Turqisë

Presidenti i Turqisë Recep Tayyip Erdogan njoftoi të martën se më shumë se 35,000 njerëz kanë vdekur në Turqi si pasojë e tërmetit të javës së kaluar, duke e bërë atë fatkeqësinë më vdekjeprurëse që nga themelimi i vendit, 100 vjet më parë.

Teksa është pothuajse e sigurt që numri i të vdekurve do të rritet edhe më tej, shumë nga dhjetëra mijëra të mbijetuarit e mbetur të pastrehë po përpiqen të përmbushin nevojat bazë, si gjetja e strehimit nga i ftohti.

Vdekjet e konfirmuara në Turqi i kaluan ato të regjistruara nga tërmeti masiv i Erzincanit në vitin 1939, që vrau rreth 33,000 njerëz.

Erdogan tha se 105,505 u plagosën si rezultat i tërmetit dhe pasgoditjeve të tij të 6 shkurtit, me epiqendër në Kahramanmaras. Pothuajse 3,700 vdekje janë konfirmuar në Sirinë fqinje, duke e çuar numrin e vdekjeve në të dy vendet në mbi 39,000.

Presidenti turk, i cili i është referuar tërmetit si “katastrofa e shekullit”, tha se më shumë se 13,000 njerëz ende po trajtohen nëpër spitale.

Duke folur në Ankara pas një takimi pesë-orësh të kabinetit të mbajtur në selinë e agjencisë së fatkeqësive AFAD, Erdogan tha se 47,000 ndërtesa, të cilat përmbanin 211,000 banesa, ishin shkatërruar ose ishin dëmtuar deri në pikën që duhet të demolohen qëllimshëm.

“Ne do të vazhdojmë punën tonë derisa të nxjerrim qytetarin tonë të fundit nga ndërtesat e shkatërruara”, tha Erdogan për përpjekjet e vazhdueshme të shpëtimit.

Agjencitë e ndihmës dhe qeveritë nga mbarë bota kanë shtuar përpjekjet për të sjellë ndihmë në pjesët e shkatërruara të Turqisë dhe Sirisë.

Situata është veçanërisht e pashpresë në Siri, ku lufta civile 12-vjeçare ka komplikuar përpjekjet për t’u dalë në ndihmë të prekurve në këtë zonë, si dhe ka sjellë presione të ndryshme mbi mënyrën se si të transferohen ndihmat në vend. Disa njerëz atje thanë se nuk kanë marrë asgjë.

Ministria siriane e Shëndetësisë njoftoi se numri i të vdekurve është 1,414, dhe 1,357 të tjerë janë të plagosus, vetëm në zonat e kontrolluara nga qeveria.

Të martën, Kombet e Bashkuara ndanë një shumë prej 397 milionë dollarësh për të ofruar “ndihma dëshpërimisht të nevojshme për gati 5 milionë sirianë” për tre muajt e ardhshëm.

Deri në marrëveshjen e së hënës midis OKB-së dhe qeverisë siriane të presidentit Bashar Assad, ndihmat ishin lejuar të dërgoheshin vetëm në një zonë përmes një kalimi të vetëm kufitar me Turqinë, ose përmes territorit qeveritar.

Presidenti Assad ra dakord të hapë dy pika të reja kalimi nga Turqia në veriperëndim të vendit të kontrolluar nga rebelët për të ofruar ndihma dhe pajisje të nevojshme për miliona viktima të tërmetit.

Vendkalimet në Bab Al-Salam dhe Al Rae do të jenë të hapura për një periudhë fillestare prej tre muajsh. /REL