Kosovarët zgjedhin Shqipërinë në fund gushti/ Mbi 36 mijë kalojnë kufirin në 24 orë

Fundjava e fundit e gushtit duket se e ka zbrazur Kosovën.

Me mijëra automjete e qytetarë janë nisur që në orët e para të mëngjesit drejt bregdetit, duke sjellë ngarkesë trafiku në rrugën e kombit e bllokime të herëpashershme në nyjën më problematike, urën mbi Drin.

Një automjeti i duhet më shumë se 30 minuta për ta përshkruar këtë segment problematik.

Të dhënat zyrtare të policisë kufitare për këto 24 orë flasin për më shumë se 36 mijë qytetarë të Kosovës që kanë hyrë në Shqipëri përmes Morinit me të paktën 10 mijë e 200 automjete.

Numri i qytetarëve dhe i mjeteve në hyrje, të paktën nga pamjet, mund të jetë shumë më i madh, pasi duke iu referuar viteve të kaluara përgjatë sezonit, policia kufitare operon me procedurën e kalimit të kufirit pa kontroll, në zbatim të marrëveshjes së përbashkët ndërqeveritare Kosovë–Shqipëri.