Kryeprokurori Çerkini: Qëllimi i autorëve ka qenë ekzekutimi i rreshterit, s’ka të bëjë me grabitje

Kosova mbrëmë është është tronditur nga vrasja e rreshterit të Policisë, Muhamed Lika, i cili u qëllua për vdekje para banesës së tij në Kaçanik.

Ani pse të dyshuarit janë akoma në arrati, bazuar në hetimet e para, Prokuroria tashmë ka një përgjigje lidhur me aludimet e raportimet për motivet e ngjarjes – rasti nuk ka qenë tentim grabitje.

Kryeprokurori i Prokurorisë Themelore në Ferizaj, Burim Çerkini, ka deklaruar për mediat se të dhënat e deritanishme tregojnë se vrasja ka qenë e qëllimshme.

“Me siguri të plotë mund të themi se nuk bëhet fjalë për grabitje. Viktima ka qenë duke u kthyer nga puna në orën 23:00 dhe po shkonte në banesën e tij. Sipas provave, qëllimi i autorëve ka qenë ekzekutimi i tij dhe jo ndonjë grabitje”, ka thënë Çerkini.

Por, a ka qenë vrasja e planifikuar?

Për këtë, Kryeprokurori nuk ka një përgjigje të prerë, megjithatë, sipas tij, fakti që në krim kanë marrë pjesë dy persona lë hapësirë për dyshime të forta.

“Përderisa kanë qenë dy persona të përfshirë, mund të jetë vrasje e planifikuar”, është shprehur ai.

Një tjetër detaj që mund të ketë lidhje me rastin është se në vitin 2021, lokalit të viktimës i ishte vënë zjarri.

“Deri tani nuk kemi gjetur ndonjë lidhje mes dy rasteve, por hetimet po vazhdojnë”, ka shtuar Çerkini.

Nga ana tjetër, Prokurori i çështjes, Ismet Rrahmani, ka bërë të ditur se rreshteri është qëlluar vetëm me një plumb fatal.

“Plumbi ka qenë tejshkues dhe viktima nuk ka pasur jelek antiplumb. Ka qenë në orarin e tij të zakonshëm të pasdites”, ka thënë ai.

Ai gjithashtu e ka hedhur poshtë pistën e grabitjes, duke theksuar se në vendin e ngjarjes nuk ndodhet asnjë institucion mikrofinanciar apo objekt tjetër që mund të ishte cak i plaçkitësve.

Prokuroria ka bërë thirrje për bashkëpunim nga qytetarët, teksa hetimet për këtë vrasje tronditëse po vazhdojnë me intensitet të lartë.