Lajçak pas takimit: Kemi pritur më shumë mirëkuptim për mundësitë që ofron propozimi evropian

I dërguari i posaçëm i BE-së për dialogun Kosovë-Serbi, Miroslav Lajçak, e ka quajtur të hapur dhe të sinqertë takimin me kryeministrin Albin Kurti.

Ai ka thënë se qëllimi ishte diskutimi i propozimit evropian për normalizimin e marrëdhënieve mes Kosovës dhe Serbisë.

“Qëllimi i takimit ishte të diskutojmë propozimin për normalizim që ia kemi paraqitur në shtator e më pas në dhjetor. Kemi më shumë se dy orë në takim që do të thotë se takimi nuk ishte i lehtë, ishte i gjatë, por shumë i hapur dhe i sinqertë. Është shumë herët të bëjmë ndonjë deklaratë dramatike sepse jemi në mes të misionit dhe do vazhdojmë në Beograd. Nuk mund të them shumë”, ka thënë ai para gazetarëve pas takimit në Qeveri.

Lajçaku ka thënë se shpreson që të shfrytëzohet potenciali i plotë i këtij propozimi.

“Kemi pritur më shumë mirëkuptim të mundësive që ofron ky propozim. Shpresoj të arrijmë aty në mirëkuptim të plotë dhe të shfrytëzohet potenciali i këtij propozimi”, ka thënë ai.

Lajçaku ishte i shoqëruar nga emisari amerikan për Ballkanin Perëndimor, Gabriel Escobar, i dërguari i posaçëm i Francës, Emmanuel Bonne, ai i Gjermanisë, Jens Plotner, dhe Francesco Talo, këshilltar i kryeministres së Italisë.