Largohet nga puna mjeku në Preshevë, Serbia nuk ia njeh diplomën e Kosovës

Nazmi Mehmeti nga Presheva i diplomuar për mjekësi në Prishtinë i cili pas një periudhe 8 vjeçare të punës si mësimdhënës i lëndëve mjekësor në shkollën e mesme teknike “Presheva” në Preshevë është larguar nga puna.

Kjo për shkak të mosnjohjes së diplomave të Kosovës nga ana e Serbisë, shkruan Reporteri.

Ai ka thënë se ka nisur punë 3 mujore në Klinikën Infektive në Prishtinë si mjek i rekrutuar për luftimin e pandemisë Covid-19 nga ana e Ministrisë së Shëndetësisë në Kosovë.

“Nga ministria e arsimit në Serbi, nuk mundem më të vazhdoj mësimdhënien për arsye të mos njohjes së diplomës së Prishtinës.
E falenderoj stafinë e SHMT ‘Presheva’ në Preshevë për punën gjatë 8 viteve, e veçanti drejtorin Telat Arifi, sekretarin Agim Dalipi, Mr Ridvan Agushi dhe gjithë kolegët e mjekësisë. Faleminderit pa masë nxënësve të mjekësisë, e ardhmja e vendit tim.
Ishin vite të arta, faleminderit për të gjitha, kohë e vështirë por me shpresë për më mirë me miqë e familjarë. Sot, kam filluar punën 3 mujore në Klinikën Infektive në Prishtinë si mjek i rekrutuar për luftimin e pandemis Kovid 19 nga ana e Ministrisë së Shëndetësisë në Kosovë”, ka shkruar ndër të tjera mjeku nga Lugina.

Ky është vetëm një nga rastet e shumta kur të rinjtë e Luginës detyrohen të largohen nga vendlindja për shkak se Serbia nuk ua njeh diplomat atyre që kanë kryer studimet në Kosovë.