Macron paralajmëron Kinën: Mbajeni Korenë e Veriut jashtë Ukrianës, nëse nuk e doni NATO-n në Azi

Presidenti francez Emmanuel Macron e paralajmëroi Kinën të premten se hezitimi i saj për të frenuar përfshirjen e Koresë së Veriut në luftën e Ukrainës mund ta çojë NATO-n më thellë në Azi.

“Prania e Koresë së Veriut në Ukrainë është një pyetje e madhe për të gjithë ne. Nëse Kina nuk dëshiron që NATO të përfshihet në Azinë Juglindore, ajo duhet ta parandalojë Korenë e Veriut të veprojë në tokën evropiane”, tha presidenti francez gjatë fjalimit të tij në forumin ndërkombëtar të mbrojtjes Shangri-La Dialogue në Singapor, sipas Politico.

Franca ka argumentuar prej kohësh se aleanca ushtarake transatlantike nuk duhet të zgjerojë ndikimin e saj në Azi dhe udhëhoqi fushatën për të bllokuar krijimin e një zyre ndërlidhëse të NATO-s në Japoni në vitin 2023.

“Unë kisha shprehur kundërshtimin tim ndaj rolit të NATO-s në Azi, sepse nuk besoj në përfshirjen në rivalitetet strategjike të të tjerëve”, tha Macron, duke lënë të kuptohet se Parisi mund të rishqyrtojë qëndrimin e tij.

Pjesëmarrja e trupave të Koresë së Veriut në operacionet ushtarake të Rusisë kundër Ukrainës po zhvillohet në kuadër të një pakti ushtarak me Rusinë, me Moskën që përdor ushtarët e Phenianit për të dëbuar forcat ukrainase nga rajoni i Kurskut.

Deklarata e Macron vjen në fund të turneut të tij në Azi, i cili filloi me trazira personale dhe vazhdoi me vizita në Vietnam dhe Indonezi, ku Franca nënshkroi një sërë marrëveshjesh, përfshirë në sektorin e mbrojtjes.