Manjati i medias, Rupert Murdoch, do martohet për herë të pestë në moshën 92-vjeçare

SHBA- Manjati mediatik, Rupert Murdoch, ka njoftuar fejesën me partneren e tij Ann Lesley Smith, 66 vjeç, me të cilën u takua në shtator në një event në Kaliforni.

“Kisha frikë të dashurohesha – por e dija se kjo do të ishte e fundit. Më mirë të jetë. Jam i lumtur”, tha biznesmeni 92 vjeçar për “New York Post”.

Murdoch u nda me gruan e katërt Jerry Hall vitin e kaluar. Manjati mediatik, i cili ka gjashtë fëmijë nga tre martesat e tij të para, shtoi:

“Ne të dy po presim me padurim të kalojmë gjysmën e dytë të jetës sonë së bashku”.

Murdoch ishte i martuar më parë me stjuardesën australiane Patricia Booker, gazetaren me origjinë skoceze Anna Mann dhe sipërmarrësen me origjinë kineze Wendi Deng.

92-vjeçari shtoi se ai i propozoi zonjës Smith në ditën e Shën Patrikut, duke thënë se kishte qenë shumë nervoz.

Bashkëshorti i ndjerë i zonjës Smith ishte Chester Smith, këngëtar.

“Për ne të dy është një dhuratë nga Zoti”, tha ajo për “New York Post”.

Ndërkohë bëhet e ditur se dasma do të bëhet në fund të verës dhe çifti do të kalojë kohën mes Kalifornisë, Montanës, Nju Jorkut dhe Britanisë së Madhe.