Mbi 300 të sëmurë brenda ditës, serbët: Nuk kemi parë një epidemi të tillë që nga 1918

Serbia ka regjistruar një numër të madh personash të infektuar me koronavirus brenda 24 orëve.

Sipas të dhënave të bëra publike nga autoritetet e shëndetit në vend, brenda ditës është konfirmuar 305 raste te reja në Serbi. Kështu, numri total i të infektuarve në vend shkon në 1,476, shkruan abcnews.al

Ndërsa, brenda 24 orëve të fundit, kanë ndërruar jetë si pasojë e koronavirusit 8 persona duke bërë që numri total i viktimave të rritet në 39. Serbët po thonë që nuk kanë parë një epidemi të tillë që nga viti 1918.

Kryeministrja e vendit, Ana Brnabić ështe shprehur:

“Ajo që ndodhi sot, sado që e kemi pritur na ka befasuar për keq. Nga dje në ora 3, kemi tetë të vdekur dhe ky është numri më i madh i të vdekurve deri tani.”

Nga ana tjetër, në Kosovë është konfirmuar edhe një rast i ri me koronavirus në Kosovë, numri i të infektuarve ka shkuar tashmë në 126.

Mali i Zi ka regjistruar 16 raste të reja me Covid-19, në total janë 160 të prekur dhe 2 viktima. Në greqi numri i personave që kanë humbur jetën ka shkuar në 56, tre prej të cilëve u ndanë nga jeta vetëm 24 orët e fundit, ndërsa 1544 rezultojnë të infektuar dhe 61 janë shëruar.

Maqedonia e Veriut regjistron 46 raste të reja me COVID-19, numri total i të prekurve 430. Gjithsej janë 11 viktima. Në vendin fqinj, 11 punonjës shëndetësorë në Spitalin e Kumanovës janë prekur nga virusi korona.

Kroacia nga ana tjetër ka regjistruar 68 raste të reja me koronavirus, numri total i të prekurve është 1079 ndërsa është shënuar një viktimë tjetër që e ka çuar totalin në 8.

Situata në vende të tjera të rajonit:

Bosnja dhe Hercegovina regjistron 35 raste të reja me COVID-19, në total 568 të prekur. Tre viktima të reja, në total 17.

Rumania regjistron 455 raste të reja me COVID-19, në total 3183 të prekur. 7 viktima të reja, në total 122.

Turqia regjistron 63 viktima të reja nga koronavirusi, duke e çuar numrin total në 356. Gjithsej të prekur janë 18, 135.