Ministria e Mbrojtjes së Kroacisë publikon dokumentin që zemëron Serbinë

Ministria e Mbrojtjes e Republikës së Kroacisë publikoi në profilin e saj X përmbajtjen e Deklaratës për Bashkëpunim në Fushën e Mbrojtjes dhe Sigurisë, e cila u nënshkrua në Tiranë më 18 mars 2025 nga ministrat e Mbrojtjes të Kroacisë, Shqipërisë dhe Kosovës.

“Për shkak të interesit të madh publik, ne po shpallim Deklaratën për Bashkëpunim ndërmjet Kroacisë dhe Shqipërisë, si anëtare të NATO-s, dhe Kosovës. Kjo nismë trepalëshe ka për qëllim forcimin e stabilitetit dhe sigurisë në Evropën Juglindore, mbështetjen e integrimeve euroatlantike dhe thellimin e aleancës ndërmjet tre vendeve mike”, thuhet në njoftimin e Ministrisë së Mbrojtjes .

Megjithatë, nënshkrimi i kësaj marrëveshje shkaktoi reagime të nxehta në rajon, veçanërisht në Serbi. Presidenti serb Aleksandar Vuçiq akuzoi Kroacinë, Shqipërinë dhe Kosovën se nuk e kanë informuar NATO-n për deklaratën, e cila, sipas tij, është shkelje e marrëveshjeve ndërkombëtare. “Kjo paraqet shkelje të marrëveshjes nënrajonale për kontrollin e armëve nga viti 1996. Duke gjykuar nga reagimet nga Kroacia dhe pjesë të tjera të rajonit, ne shohim se ata nuk janë shumë të interesuar për këtë. Unë jam pothuajse i bindur se NATO-ja as që ishte e informuar dhe se as që u është thënë se cilat marrëveshje po shkelin”, tha Vuçiq.