Igor Kirilov ishte një nga gjeneralët më të famshëm rusë. Ai ishte zyrtarisht përgjegjës për forcat bërthamore, biologjike dhe kimike të Rusisë dhe njihej gjithashtu për përhapjen e dezinformatave.
Banorët e një ndërtese në rrugën Ryazanski Prospekt në Moskë dëgjuan një shpërthim të martën në mëngjes dhe kur shikuan nga dritarja panë dy trupa në tokë.
Komiteti Hetimor Rus më vonë konfirmoi se viktimat ishin gjeneral-lejtnant Igor Kirilov dhe ndihmësi i tij Ilya Polikarpov.
Reagime në Moskë dhe Kiev
Hetuesit thanë se bomba ishte vendosur në një skuter elektrik të lënë pranë hyrjes së ndërtesës. Ai ka shpërthyer në momentin kur viktimat po dilnin nga godina. Thuhet se vrasësi i dyshuar i ka monitoruar lëvizjet e Kirilovit me kamera vëzhguese të vendosura në një automjet të marrë me qira, të cilën ai e ka parkuar pranë ndërtesës, shkruan Deutsche Welle.
Komisioni Hetimor hapi procedimin penal për akuzat e terrorizmit, vrasjes dhe tregtisë së paligjshme të armëve. Mediat ruse, duke cituar burime nga Komiteti Hetues, raportojnë se autoritetet dyshojnë se shërbimet e inteligjencës ukrainase kanë organizuar shpërthimin.
Zëdhënësja e Ministrisë së Punëve të Jashtme ruse, Marija Zakharova, deklaroi se Kirilov “për vite me radhë ekspozoi sistematikisht krimet e anglo-saksonëve”. Përfaqësuesi i Dumës së Shtetit Yevgeny Revenko akuzoi Ukrainën për organizimin e atentatit, duke thënë: “Regjimi i Kievit… ka treguar natyrën e tij kriminale”.
Ndërkohë, Mihajlo Podoljak, këshilltar i presidentit ukrainas, hodhi poshtë akuzat që lidhin Kievin me shpërthimin.
Shpërthimi të martën (17/12) erdhi një ditë pasi Shërbimi i Sigurisë së Ukrainës (SBU) akuzoi Kirilov në mungesë për urdhërimin e përdorimit të armëve kimike kundër forcave të armatosura ukrainase.
Shqetësim për reputacionin e Asadit
Në vitin 2017, Kirilov u emërua kreu i Forcave të Mbrojtjes Bërthamore, Biologjike dhe Kimike Ruse (NBC). Më vonë atë vit, ai u bë zëdhënësi i qeverisë ruse në lidhje me sulmin me armë kimike të prillit 2017 në qytetin sirian të Douma që vrau dhjetëra njerëz.
Më pas, Shtetet e Bashkuara, Britania e Madhe dhe Franca akuzuan regjimin e presidentit të atëhershëm Bashar al-Assad për sulmin dhe si kundërpërgjigje sulmuan disa objektiva qeveritare në Siri. Në një konferencë për shtyp të organizuar nga Rusia dhe Siria në Hagë, Kirilov pretendoi se sulmi kimik ishte i organizuar.
Sipas tij, helmi luftarak sarin ishte shtuar qëllimisht në disa mostra të mbledhura në vendin e sulmit. Ky pretendim nuk është vërtetuar kurrë në mënyrë të besueshme.
Pretendime të rreme për laboratorët biologjikë në Ukrainë
Informatat si ajo në Hagë, ku Kirilov ishte folësi kryesor, u bënë më të shpeshta pasi Rusia nisi një pushtim të plotë të Ukrainës në shkurt 2022. Në fjalimet e tij, Kirilov akuzoi Shtetet e Bashkuara për ndërtimin e laboratorëve në Ukrainë për të zhvilluar armë biologjike që synojnë të luftojnë kundër Rusisë.
Sipas pretendimeve të tij, amerikanët synonin të përdornin dronë për të transmetuar mushkonjat e infektuara me virusin e etheve të verdha në zonat ku ishin vendosur trupat ruse. Ai nuk ka ofruar asnjë provë për këto akuza. Ai gjithashtu nuk ofroi asnjë provë për deklaratën e tij se rritja e rasteve të gripit të shpendëve në Rusi ishte për shkak të migrimit të zogjve të infektuar nga Ukraina.
Krahas kësaj, Kirilov pohoi se ushtria ukrainase përdor substanca toksike në fushën e betejës dhe kryen sulme terroriste. Një nga pretendimet e tij të fundit në gusht të këtij viti ishte se Ukraina është gati të përdorë të ashtuquajturat një bombë e pistë për përhapjen e lëndëve radioaktive në territorin e saj.
Pse Kirilov?
Shkencëtari politik gjerman dhe eksperti i Rusisë Hans-Henning Schröder i sheh pretendimet e rreme të Kirilovit si propagandë për të justifikuar luftën e paprovokuar të Rusisë kundër Ukrainës. Schröder tha se Kirilov kishte për detyrë të bindte rusët, brenda dhe jashtë Rusisë, se Ukraina ishte e rrezikshme dhe se ofensiva ruse kishte prishur planet e këqija të Kievit për Rusinë.
Schröder supozon se roli i Kirilovit si propagandues tërhoqi vëmendjen e shërbimeve të inteligjencës ukrainase. Përndryshe, Kirilov nuk do të ishte me shumë interes për Shërbimet e Sigurisë së Ukrainës (SBU) sepse ai nuk komandonte trupa apo ishte përgjegjës për vendosjen e ushtarëve apo sistemeve të armëve, shtoi Schröder.
‘Akti i Sabotimit’
Disa media citojnë burime nga SBU të cilët thonë se Shërbimi i Sigurisë së Ukrainës ka marrë me të vërtetë përgjegjësinë për vrasjen e Kirillov. Nëse kjo është e vërtetë, sipasOleksiy Melnik, i cili drejton programet e politikës së jashtme dhe sigurisë ndërkombëtare në Qendrën Razumkov në Kiev, akti nuk duhet të trajtohet si një sulm terrorist.
– Kur dy shtete janë në luftë dhe eliminohet një ushtarak aktiv i palës kundërshtare, duhet të klasifikohet si akt sabotazhi, tha Melnik.
Ka të dyshuar të tjerë të mundshëm për shpërthimin përveç SBU.
Melnik dhe Schröder thonë se pas vrasjes së Kirilovit mund të qëndrojë edhe një konflikt i korporatës apo ndërinstitucional. Schröder shtoi se vrasja mund të shihet gjithashtu në kontekstin e një spastrimi në Ministrinë ruse të Mbrojtjes që filloi pasi Putin shkarkoi ish-ministrin e Mbrojtjes Sergei Shoigu në maj.
“Me siguri mund të imagjinohet konflikte për burimet, ku një grup komploton kundër një tjetri, tha Schröder.
Por deri më tani ne fakt dimë shumë pak për konfliktet e dhunshme mes grupeve rivale kriminale brenda Ministrisë së Mbrojtjes, përfundoi ai, siç raporton Deutsche Welle.
