Një grup kriminal prej 15 personash është goditur nga policia dhe prokuroria e Matit pas hetimeve të nisura nga viti 2019. Gjatë kësaj periudhe të dyshuarit kanë kultivuar kanabis në zonat malore ndërkohë që një pjesë e bimëve narkotike u janë sekuestruar në pesë operacione të ndryshme të kryera nga policia. Organizator i aktivitetit kriminal ishte Gëzim Koleci, kryetar fshati në zonat ku kultivohej droga.
Policia e Dibrës ka arritur të zbulojë një grup të strukturuar kriminal të cilët merreshin me trafikun e drogës. Grupi kriminal organizonte nga mbjellja e bimëve të kanabisit, përpunimi dhe më pas shitja e tij në treg.
Vetë kryetari i fshatit Lam i Madh, Gëzim Koleci ishte në organizatori i kësaj veprimtarie ndërkohë që në grupin e tij ishin njerëz që kishin lidhje farefisnore apo ishin nga i njëjti fshat.
Operacioni u kodua “Kepi i Vozajve”
“Në funksion të këtij procedimi të ndjekur me metoda speciale hetimi, në bashkëpunim të ngushtë me Prokurorinë Mat, është arritur të provohet me prova dhe fakte bashkëpunimi i këtyre shtetasve, që funksiononin në formën e një grupi të mirëorganizuar, në kryerjen e veprimtarisë kriminale të kultivimit të bimëve narkotikëve në 5 episode, përgjatë periudhës kohore 2019 – 2021, ku këta shtetas në zonën malore Lam i Madh, njësia Administrative Derjan, Mat, kanë kultivuar në kohë dhe vende të ndryshme një sasi bimësh narkotike” deklaroi drejtori i Drejtorisë Vendore të Policisë Dibër në një konferencë për median krah prokurorit të Matit.
Në pranga kanë rënë 14 persona ndërsa një tjetër është në kërkim.
Jo vetëm kryetar fshati
Sipas policisë kryetari i fshatit ishte organizatori ndërsa djemtë e tij siguronin shitjen dhe tregun e marijuanes.
“Nga hetimet e kryera ka rezultuar se organizotar i kësaj veprimtarie është shtetasi Gëzim Koleci, i cili ka mbajtur dhe detyrën e kryetarit të fshatit Lam i Madh ku nëpërmjet personave të lartëpërmendur, me të cilët ka lidhje familjare dhe fisnore, organizonte punën për kultivimin e lëndëve narkotike, përpunimin e saj dhe më pas gjetjen e tregut për shitje, të cilën e siguronte nëpërmjet djemve të tij shtetasve Vilson dhe Gestian Koleci, të identifikuar edhe si transportues të saj, për të cilët Gjykata e Rrethit Gjyqësor Krujë ka vendosur më parë masën e sigurisë “Arrest shtëpie”, për veprën penale “Prodhim dhe shitje të narkotikëve”, pasi po në funksion të këtij procedimi këta shtetas më datë 22.03.2021 në aksin rrugor Fushë Krujë – Laç, ju është sekuestruar sasia prej 6.8 kg lëndë narkotike marijuanë’
Te arrestuar
Gëzim Koleci, 55 vjeç, banues në fshatin Lam i Madh, Njësia Administrative Derjan, Mat
Mehmet Koleci, 45 vjeç, lindur në fshatin Lam i Madh, banues në Paskuqan, Tiranë.
Idajet Koleci, 43 vjeç, lindur në fshatin Lam i Madh, banues në Paskuqan, Tiranë.
Albert Koleci, 40 vjeç, banues në fshatin Lam i Madh.
Vilson Koleci, 30 vjeç, lindur në fshatin Lam i Madh, banues në Paskuqan, Tiranë.
Gestian Koleci., 26 vjeç, banues në fshatin Lam i Madh.
Lezan Koleci, 62 vjeç, lindur në fshatin Lami i Madh, banues në Laprakë, Tiranë.
Agim Koleci, 29 vjeç, lindur në fshatin Lami i Madh, banues në Kamëz, Tiranë.
Besmir Koleci, 36 vjeç, lindur në fshatin Derjan, banues në Kamëz, Tiranë.
Afrim Haspepa, 48 vjeç, lindur në fshatin Lam i Madh, banues në Kamëz, Tiranë.
Fatjon Doda, 36 vjeç, lindur në fshatin Macukull, banues në Njësia Bashkiake Nr.5, Tiranë.
Lezan Koleci, 62 vjeç, lindur në fshatin Lami i Madh, banues në Kamëz, Tiranë.
Rasim Xheçuka, 52 vjeç, lindur në fshatin Lam i Madh, banues në Kamëz, Tiranë.
Gazmir Xheçuka, 39 vjeç, lindur në fshatin Lam i Madh, banues në Kamëz, Tiranë.
Dhe është shpallur në kërkim policor shtetasi Baftjar Xheçuka, 54 vjeç, lindur në fshatin Lam i Madh, banues në Kamëz, Tiranë.
Rastet
Dhe konkretisht, janë identifikuar e asgjësuar nga policia këto raste:
Më datë 27.09.2019, janë konstatuar gjithësej 89 bimë.
Më datë 01.10.2019, janë konstatuar gjithësej 95 bimë.
Më datë 04.09.2020, janë konstatuar gjithësej 99 bimë.
Më datë 15.09.2020, janë konstatuar gjithësej 61 bimë.
Më datë 17.09.2020, janë konstatuar gjithësej 188 bimë, si dhe janë konstatuar 3633 bimë në proces tharje.
Dosja
Ndaj tyre rëndon akuza: “Kultivim i bimëve narkotike”, “Prodhim dhe shitje të narkotikëve” të kryera në bashkëpunim, “Mbajtje pa leje dhe prodhim i armëve, i armëve shpërthyese dhe i municioneve”,
Arrestimet janë kryer nën drejtimin e Prokurorisë Mat, në funksion të procedimit penal nr 134, viti 2019. Operacioni u zhvillua nga DVP Dibër, Komisariati i Policisë Mat, Departamenti i Policisë Kriminale në Drejtorinë e Përgjithshme të Policisë së Shtetit, DVP Tiranë, DVP Durrës, FNSH Tiranë, nën drejtimin e Prokurorisë Mat.
Ndaj tyre gjykata ka dhënë masën e sigurisë “Arrest me burg”.
Gjithashtu po në funksion të këtij procedimi janë sekuestruar një armë zjarri automatik, një armë gjahu teke pa leje përkatëse dhe municion luftarak. Si dhe janë sekuestruar 13 telefona celular që përdoreshin nga shtetasit e lartëpërmendur.
Nën drejtimin e Prokurorisë nga strukturat hetimore të DVP Dibër e Komisariatit të Policisë Mat vijon puna për dokumentimin e plotë ligjor të kësaj veprimtarie kriminale si dhe për identifikimin dhe arrestimin e personave të tjerë të implikuar.
