Opozita zgjedh kandidatin, kush është 74-vjeçari që do përballet me Erdogan në zgjedhjet presidenciale të majit

Koalicioni i gjashtë partive opozitare njoftoi sonte se ka zgjedhur Kemal Kilicdaroglu, kreun e Partisë Popullore Republikane (CHP) si kandidat presidencial në zgjedhjet e ardhshme presidenciale.

Kilicdaroglu do të përballet me presidentin në detyrë Rexhep Tajip Erdogan, i cili ka drejtuar Turqinë për 20 vitet e fundit, më 14 maj.

“Kemal Kilicdaroglu është kandidati ynë për president,” tha Temel Karamolaoglu, kreu i Partisë së Lumturisë, para turmës jashtë selisë së partisë në Ankara, ku po takoheshin kryetarët e gjashtë partive.

Kilicdaroglu, 74 vjeç, kreu i partisë së dytë më të madhe në vend, synon të dalë nga hija e Erdoganit duke e larguar atë nga presidenca.

“Tryeza jonë është tryeza e paqes. Qëllimi ynë i vetëm është ta kthejmë vendin në ditët e prosperitetit, paqes dhe gëzimit”, tha ai.

Sondazhet tregojnë se opozita është pak përpara koalicionit qeverisës, por zgjedhjet e ardhshme pritet të vendosen me një “fije peri”.

“Së bashku do të rivendosim autoritetin e moralit dhe drejtësisë. Ne, Aleanca e Kombit, do ta udhëheqim Turqinë mbi bazën e bashkëpunimit dhe pajtimit. Ligji dhe drejtësia do të mbizotërojnë”, shtoi Kilicdaroglu.

“Aleanca e Kombit” erdhi në prag të ndarjes të premten, vetëm 10 javë para zgjedhjeve. Nacionalisti “Partia e Mirë” e Meral Aksener nuk u pajtua me kandidaturën e Kilicdaroglu dhe propozoi si kandidatë kryetarët e bashkive të Stambollit apo Ankarasë, Ekrem Imamoglu dhe Mansur Yavas.

Megjithatë, të dy e refuzuan këtë propozim.

Pas takimit me dy kryebashkiakët dhe vetë Kilicdaroglu sot në Ankara, Aksener më në fund iu bashkua Aleancës.

Partia pro-kurde HDP, e cila e sheh pozitivisht kandidaturën e Kilicdaroglu, njoftoi se mund ta mbështesë atë dhe të mos paraqesë kandidatin e saj në zgjedhjet presidenciale dhe tha se ishte e hapur për bisedime me Aleancën.

Në zgjedhjet e mëparshme parlamentare, HDP grumbulloi një përqindje prej 12%, ndërsa kandidati i saj presidencial, i cili aktualisht është i burgosur,  mori një përqindje prej 8.4% në zgjedhjet presidenciale 2018.

Kjo parti deri më tani ishte lënë jashtë Aleancës, për shkak të pranisë së Partisë së Mirë, linja politike e së cilës është e papajtueshme me atë të HDP-së.

“Pritja jonë e qartë është kalimi në një demokraci të fortë. Nëse mund të biem dakord për parimet themelore, ndoshta do ta mbështesim atë në zgjedhjet presidenciale”, tha bashkëkryetari i HDP Mitat Sanjar për kanalin televiziv privat Haberturk.