Paralajmërimi serioz i Gjermanisë: Mos supozoni se Putini ‘imperialist’ nuk do të sulmojë vendet e tjera

Gjermania lëshon një paralajmërim serioz për vendet e botës, veçanërisht për ato që janë afër Rusisë. Kancelari Olaf Scholz, i cili priti në Berlin kryeministret e Suedisë dhe Finlandës, këshilloi që askush të mos supozojë se Putini nuk do të sulmojë shtetet e tjera, pasi shkeli ligjin ndërkombëtar me luftën në Ukrainë.

“Ishte e qartë për të gjithë ne se kufijtë nuk do të lëvizeshin me forcë dhe se sovraniteti i vendeve duhet të respektohet. Rusia e shkeli këtë ligj dhe prandaj askush nuk mund të supozojë se presidenti rus dhe qeveria ruse nuk do ta shkelin ligjin me dhunë në vendet e tjera në një rast tjetër. Kjo është arsyeja pse ne të gjithë vendosëm të zgjerojmë shpenzimet tona të mbrojtjes”, u shpreh kancelari gjerman Olaf Scholz.

Kancelari konfirmoi se Gjermania do të mbështesë Finlandën dhe Suedinë nëse ato vende do të vendosin t’i bashkohen NATO-s. Dy kryeministret, Magdalena Andersson dhe Sanna Marin, gjenden në një vizitë dy ditore në Berlin për të diskutuar situatën me sigurinë në Europë, teksa në vendet e tyre kanë nisur një debat publik për të vendosur lidhur me aplikimin për anëtarësim në Organizatën ushtarake veri atlantike.

“Sanksionet e BE kundër Rusisë kanë nisur të shfaqin efektet e tyre dhe është e nevojshme të vazhdojmë t’i zgjerojmë ato. Rusia duhet të kuptojë se ne jemi në këtë për një kohë të gjatë”, tha kryeministrja e Finlandës Sanna Marin.

“Suedia, si vendet e tjera, po i përshtatet rrethanave të reja. Ndërtimi i mbrojtjes sonë kombëtare po përshpejtohet dhe ne po pasqyrojmë vendimin e guximshëm gjerman për të rritur shpenzimet tona të mbrojtjes në 2% të PBB-së dhe ne do ta bëjmë këtë sa më shpejt të jetë e mundur praktikisht”, deklaroi kryeministrja e Suedisë, Magdalena Andersson.

Ndërkohë, Scholz më herët, gjatë një interviste për median Stern, akuzoi presidentin Putin për politika imperialiste dhe se vendet fqinje I konsideron si kopshtin e Rusisë. Kancelari gjerman tha se shefi i Kremlinit dëshiron të zgjerojë territorin e vendit të tij duke shtyrë kufijtë me dhunë, në një përpjekje për të risjellë të shkuarën, Bashkimin Sovjetik.