Presidenti i Libanit thotë se bisedimet me Izraelin mund të shënojnë fundin e vuajtjeve

Presidenti libanez Joseph Aoun tha se bisedimet me Izraelin në Uashington mund të shënojnë fillimin e fundit të vuajtjeve të popullit libanez.

Aoun tha se nëse sulmet izraelite vazhdojnë, stabiliteti nuk do të kthehet në Libanin jugor.

Bisedimet e ndërmjetësuara nga SHBA-të midis Izraelit dhe Libanit kanë filluar në Uashington, duke shënuar kontaktet e para të tilla midis dy vendeve që nga viti 1993.

Ambasadori i Izraelit në SHBA, Yechiel Leiter pas përfundimit të bisedimeve me Libanin ka dhënë një konferencë për mediat. Ai i ka cilësuar bisedimet ‘një fitore për paqen’.

“Sot zbuluam se jemi në të njëjtën anë të ekuacionit dhe kjo është gjëja më pozitive që mund të kishim arritur”, thotë ai në një deklaratë.

Palët në bisedime diskutuan një “kufi të përcaktuar qartë” midis Izraelit dhe Libanit, tha Leiter.

“E bëmë shumë të qartë se siguria e civilëve tanë nuk është çështje negociatash. Këtë e kupton qeveria e Presidentit të Libanit, Joseph Aoun. Kjo ishte një fitore për mendjen e shëndoshë, për përgjegjësinë dhe për paqen”, u shpreh ai.

Gjithashtu shtoi se punohet për një traktat paqeje “të plotë”.