Dyfishim i vlerës së tarifave të rrymës është propozuar nga furnizuesi me rrymë, KESCO, në kërkesën e bërë te Zyra e Rregullatorit të Energjisë për shqyrtim të jashtëzakonshëm të tarifave.
Të premten, ZRRE-ja ka publikuar propozimin e KESCO-s, për të cilin pritet të vendoset brenda dy javësh, siç ka mësuar KOHA. KESCO ka arsyetuar kërkesën e vet me mosdisbursimin e subvencioneve të premtuara nga Qeveria dhe me rritjen e çmimeve të energjisë në tregjet ndërkombëtare.
Nga tabela shihet se bëhet fjalë për një ngritje gati 100 për qind të çmimit.
Aktualisht qytetarët paguajnë dy lloje tarifash, për shkak të bllokut tarifor të vendosur në 800kWh. Shtrenjtimi është propozuar si për ata që shpenzojnë më pak se 800kWh në muaj, si për ata që e tejkalojnë blloktarifën.
Tarifa e ulët për ata që shpenzojnë nën këtë bllok është 2.89 centë për kWh, ndërsa e larta për konsumatorët familjarë që shpenzojnë më pak se ky bllok tarifor është 6.75 centë për kWh. Propozimi i KESCO-s është që me tarifat e reja çmimet të ngrihen në 5.43 centë për kWh si tarifë të ulët dhe 12.68 centë për kWh për tarifë të lartë.
Ndërkaq çdo kWh që shpenzohet aktualisht mbi 800kWh të shpenzuar në muaj, kushton aktualisht 5.9 centë në tarifë të ulët dhe 12.52 në të lartën. Propozimi i çon këto tarifa në 11.09 centë për të ulëtën dhe 23.53 centë për të lartën.
Tarifë e ulët është ajo që shpenzohet gjatë natës, ndërsa e larta ajo që shpenzohet gjatë orëve të ditës.
Të martën, Zyra e Rregullatorit për Energji njoftoi se ka hapur proces për rishqyrtim të jashtëzakonshëm të tarifave në mungesë të subvencioneve. Një ditë më pas, në një konferencë për media ministrja e Ekonomisë, Artane Rizvanolli, ka theksuar se është duke u punuar në gjetjen e modaliteteve për jetësimin e zotimit. Ajo, ndërkaq, ka bërë thirrje për kursimin e energjisë me qëllim të kapërcimit të një “dimri të jashtëzakonshëm”, si shkak i pushtimit të Ukrainës nga Rusia.
Në shkurt sivjet ZRRE-ja pati vendosur për tarifa të reja. Ishte kthyer blloktarifa në 800kWh. Kushdo që shpenzon mbi të, do të faturohet me tarifa më të larta. Qeveria pati vendosur të ndajë mbi 100 milionë euro për të ndihmuar në tejkalimin e krizës, ndërsa vetë ministrja e Ekonomisë, Artane Rizvanolli, pati konfirmuar në korrik se nga kjo shumë totale, janë shpenzuar rreth 23 milionë euro.
Partia Demokratike e Kosovës pati çuar vendimin e ZRRE-së në gjykatë. Themelorja dhe Apeli patën vendosur që të pezullohet vendimi, ndërsa Supremja largoi masën e pezullimit.
