Sanksionet e Kurtit efekte dhe në Shqipëri: Dhjetëra kamionë me produkte bllokohen në doganë

Sanksionet e vendosura nga qeveria Kurti për të ndaluar çdo automjet të transportit të mallrave me targa serbe për të hyrë në territorin e Kosovës pas arrestimit të tre policave të Kosovës nga Serbia, kanë dhënë efekte negative edhe për prodhimet shqiptare.

Janë me dhjetëra kamionë të ngarkuar me prodhimet tona vendore që janë bllokuar në pikën kufitare të Vërmicës në Morinë të Kukësit.

Drejtuesit e kamionëve thonë se janë të bllokuar prej dy ditësh, dhe se

ndalimi ka ardhur pa paralajmërim, thjesht sepse kanë automjetet me targa serbe, pavarësishtë se malli është shqiptar dhe destinacioni është për Kosovë apo Serbi.

Të bllokuar janë edhe drejtuesit shqiptarë të kamionëve nga Bujanovci.

Ata apelojnë që kjo situatë të marrë zgjidhje të shpejtë dhe tregtia mos të bëhet viktimë e politikës.

Nisma e “Ballkanit të Hapur” ka rritur ndjeshëm shkëmbimin e mallrave të vendeve të Ballkanit, sidomos të Shqipërisë, Maqedonisë së Veriut e Serbisë. Por përkeqësimi i marrëdhënieve mes Kosovës e Serbisë nga situata në veri të Mitrovicës ka shkaktuar një mori efektesh zinxhirë që po i vuajnë të gjithë.