SHBA-ja e OSBE-ja reagojnë pasi një serbi në Istog i digjet shtëpia

Shtetet e Bashkuara të Amerikës dhe misioni i OSBE-së në Kosovë kanë dënuar djegien e një shtëpie në fshatin Veriq të Istogut, ku supozohej të banonte një serb i Kosovës. Ata kanë bërë thirrje që autoritetet e vendit ta hetojnë rastin.

Policia e Kosovës ka thënë se ishte njoftuar për rastin të hënën, 10 korrik, në mëngjes nga fqinji i viktimës. Në vendngjarje kishin dalë zjarrfikësit e njësitet e tjera, kanë thënë nga PK-ja.

Ambasadori amerikan në Kosovë, Jeff Hovenier, e ka dënuar sulmin. Ai ka shkuar në shtëpinë e djegur dhe nga aty ka dënuar këtë veprim.

“E vizitova që ta shoh vetë, me lejen e familjes, e cila kishte qëllim të rikthehej në pronën e saj. E dënoj këtë sulm dhe këtë përpjekje për të frikësuar një familje nga ushtrimi i të drejtës së saj për t’u rikthyer në shtëpinë e tyre”, ka thënë Hovenier.