Shkencëtari shqiptaro-amerikan, Niko Qafoku, ka marrë emërimin më të lartë në hierarkinë e anëtarëve të “Soil Science Society of America” (SSSA). Ai është nderuar me titullin “Fellow of the Soil Science Society of America”, i cili u jepet vetëm një numri shumë të vogël (rreth 0.3%) të anëtarëve të SSSA.
Lajmin e ka bërë të ditur vetë Qafoku nëpërmjet një postimi në Twitter ku shkruan se:
“Nder i madh të zgjidhem Anëtar i Shoqërisë së Shkencës së Tokës të Amerikës, që është njohja më e lartë e dhuruar nga SSSA. Anëtarët emërojnë kolegë të denjë bazuar në arritjet e tyre dhe shërbimin e merituar. Deri në 0.3 përqind të anëtarëve të Shoqatës mund të zgjidhen”.
Prej vitesh Niko Qafoku drejton Laboratorin Kombëtar të Pacific Northwest, në Richland të Washington State, si dhe është redaktor shkencor i revistës së Shoqatës Amerikane të Shkencave të Tokës.
Ndonëse prej me shume se dy dekadash Niko Qafoku ushtron profesionin e tij në Amerikë ai shpesh është përfshirë edhe në studime dhe konferenca të organizuara ne Shqipëri. Pjesëmarrja e tij e fundit ka qenw nw muajin shtator në konferencën “Kërkimi shkencor në hapësirën mbarëshqiptare dhe roli i Diasporës shkencore” të organizuar nga Fondi Shqiptar për Zhvillimin e Diasporës, ku trajtoi temën “Integrimi i Diasporës në ngritjen dhe forcimin e kapaciteteve shkencore dhe arsimore”
Ai u vendos në Amerikë fillimisht në vitin 1994 si student me bursën “Fulbright Scholar” në Institutin Politeknik dhe Universitetin Shtetëror të Virxhinias. Po atë vit pranohet në shkollën pasuniversitare të Universitetit të Xhorxhias. Përfundon studimet aty më 1998 dhe fiton njëkohësisht gradën shkencore Master në Matematikë të Aplikuar dhe Informatikë,si dhe titullin PhD në kiminë e tokës dhe të mjedisit.
Shoqëria Shkencore e Tokës së Amerikës (SSSA), është shoqëria më e madhe e dedikuar dhe specifike e tokës në Shtetet e Bashkuara. Ajo është krijuar në vitin 1936 nga bashkimi i Seksionit të Tokave të Shoqatës Amerikane të Agronomisë dhe Shoqatës Amerikane të Sjelljes së Tokave.
