Shqipëria shpall “non grata” dy diplomatë iranianë

Shqipëria ka vendosur të shpallë “non grata” dy përfaqësues diplomatikë iranianë në Shqipëri.

Vendimin e bëri të ditur ministri në Detyrë për Europën dhe Punët e Jashtme, Gent Cakaj, nëpërmjet një postimi në Facebook.

“Ministria për Europën dhe Punët e Jashtme ka vendosur sot, që përfaqësuesit diplomatikë të Ambasadës së Republikës Islamike të Iranit në Shqipëri, z. Mohammad Ali Arz Peimanemati dhe z. Seyed Ahmad Hosseini Alast, të shpallen persona të padëshirueshëm, për shkak të zhvillimit të veprimtarisë në mospërputhje me statusin e tyre dhe parimet e Konventës së Vjenës për Marrëdhëniet Diplomatike. Dy përfaqësueseve të Republikës Islamike të Iranit ju është kërkuar largimi i menjëhershëm nga territori i Republikës së Shqipërisë”.

Në dhjetor të vitit 2018, Shqipëria dëboi ambasadorin iranian në Tiranë, Gholamhossein Mohammadnia dhe një diplomat të kësaj ambasade për cenim të sigurisë kombëtare. Vendimi asokohe u përgëzua nga Sekretari amerikan i Shtetit Mike Pompeo.