<p><strong>Prokuroria e Posaçme SPAK ka shtuar akuzat ndaj kreut të arrestuar të Bashkisë Tiranë, Erion Veliaj dhe bashkëshortes së tij, Ajola Xoxa, duke i vendosur edhe nën sekuestro një pronë, e cila është në emër të një subjekti tregtar.</strong></p>
<p>Sipas një njoftimi zyrtar, SPAK ka caktuar masën e sigurimit pasuror “sekuestro preventive”, mbi pasurinë e paluajtshme: Pasuria nr. dhe shtesë me numër pasurie, regjistruar në ASHK në emër të subjektit tregtar “A. K.” shpk;.</p>
<p>Nga të dhënat konkrete të mbledhura deri në këtë fazë të hetimit paraprak, ekziston dyshimi i arsyeshëm i bazuar në prova se shtetasit nën hetim E. V. dhe A. X. kanë interesa pasurore faktike mbi dy pasuri (njëra prej të cilave shtesë pasurie), të cilat janë fqinje me apartamentin që ndodhet në Selitë, (rezidenca Kodra e Diellit), ku aktualisht këta shtetas jetojnë.</p>
<p>Në bazë të shpjegimit të SPAK, pas kryerjes së veprimeve hetimore në kuadër të këtij procedimi penal, Prokuroria e Posaçme ka arritur në konkluzionin se ekzistojnë të dhëna konkrete që të çojnë në dyshimin e arsyeshëm se shtetasit nën hetim E. V. dhe A. X. kanë konsumuar edhe elementët e veprës penale të “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, parashikuar nga neni 257/a/2 i Kodit Penal.</p>
<p>Për këtë shkak, më datë 20.05.2025 emrat e tyre janë regjistruar në regjistrin e njoftimit të veprave penale, duke i atribuuar veprën penale cituar më lart.</p>
<p>Veliaj ndërkohë është në hetim për korrupsion pasiv dhe pastrim parash, ndërsa ndodhet në arrest me burg që prej 10 shkurtit.</p>
<p>Gjykata e Posaçme u njoh me informacionin dy mujor dhe veprimet hetimore të kryera nga SPAK.</p>
<p>Prokuroria e Posaçme, nga ana e saj ka deklaruar se gjatë kësaj kohe janë kryer 114 veprime hetimore që lidhen me dosjen ndaj Veliajt.</p>
<p>Gjatë seancës, përfaqësuesit e SPAK kanë kërkuar që masa e sigurisë “arrest me burg” të vazhdojë. Ndërsa, avokatët kanë kërkuar që masa e sigurisë të shuhet.</p>
<p>Ndërkohë, sipas vendimit të arsyetuar të Apelit të Posaçëm, arsyeja kryesore e konfirmimit të masës së arrestit me burg për Veliajn është “dyshimi i bazuar në prova se ai dhe bashkëshortja e tij (Ajola Xoxa) mund të kenë tentuar të prishin provat”.</p>
<p>Përgjigjet Veliaj<br />
Sipas një komunikate nga avokatët e Veliajt, çifti nuk është pronar i pasurisë së sekuestruar dhe ata të dy nuk kanë asnjë lidhje pasurore, apo ligjore, me subjektin tregtar, nën emrin e të cilit është regjistruar prona.</p>
<p>“As Z. Erion Veliaj dhe as Znj. Ajola Xoxa nuk janë pronarë të kesaj pasurie të sekuestruar dhe nuk kanë asnjë lidhje pasurore apo ligjore me subjektin tregtar “A.K.” shpk, e as me pasurinë që është objekt i masës së sigurimit pasuror ‘sekuestro preventive’”, shkruhet në reagim.</p>
<p>Sipas avokatëve, pasuria paluajtshme në pronësi të Xoxës është apartamenti ku ata banojnë, në zonën e Selitës, krijuar para marteses dhe ky apartament nuk është dhe nuk ka qenë në asnjë moment objekt hetimi apo sekuestrimi nga ndonjë autoritet ligjzbatues.</p>
<p>“Theksojmë se është në të drejtën ligjore të organit të akuzës të kryejë hetime, por dyshimet e ngritura duhet të bazohen në fakte konkrete dhe prova të verifikueshme, në respekt të parimit të prezumimit të pafajësisë dhe të drejtave themelore të individit”, vijojnë ata më tej.</p>
<p>Ndërsa në fund, paralajmërojnë se përpjekjet “për të deformuar realitetin dhe lidhur emrat e tyre me çështje që nuk kanë asnjë bazë ligjore, përbën keqinformim të opinionit publik dhe sulm ndaj figurës publike të Veliajt”.</p>
<p>Për këtë, do të ndiqen rrugët ligjore për mbrojtjen e reputacionit dhe zbardhjen e të vërtetës, siç përmendet në njoftimin e avokatëve.</p>


Një emigrant shqiptar në Greqi është bërë personazhi i ditës në mediat e vendit fqinj…
Një avion pasagjerësh i “Air India” u rrëzua në aeroportin e Ahmedabad, një qytet në…
Burime që folën për mediat amerikane pohuan se Izraeli planifikon të kryejë operacion ushtarak kundër…
Një influencuese nga Brazili është bërë virale në rrjetet sociale pasi tregoi mënyrën e pazakontë…
Shtetet e Bashkuara kanë urdhëruar evakuimin e stafit jo-thelbësor dhe familjarëve të tyre nga ambasada…
Kryeministri i Izraelit, Binyamin Netanyahu, deklaroi: “Edhe pse disa nuk ndajnë të njëjtin mendim me…
